O‘zbekiston qonunchiligi JST bitimlariga uyg‘unlashtiriladi. Prezident bu boradagi farmonni imzoladi
Shavkat Mirziyoyev O‘zbekiston milliy qonunchiligi jahon savdo tashkiloti bitimlariga uyg‘unlashtirilishi munosabati bilan ayrim hujjatlariga o‘zgartirishlar kiritish to‘g‘risidagi farmonni imzoladi.
Hujjat bilan 2024-yil 1-yanvardan boshlab alohida davlatlardan olib kiriladigan mahsulotlarning muvofiqligini majburiy baholashdan ozod etish tartibi bekor qilinmoqda. Shuningdek, ushbu sanadan boshlab import tovarlarni davlat tilida markirovka qilish tartibiga o‘zgartirish kiritiladi.
Bundan tashqari, 2025-yil 1-yanvardan boshlab dori vositalarini va tibbiyot buyumlarini import qilishda bojxona qiymatining 1,2 foizi miqdorida bojxona rasmiylashtiruvi uchun yig‘im bekor qilinadi. Prezident 2024-yilga qadar mazkur yig‘im bekor qilinishi munosabati bilan tegishli vazifalarni amalga oshirishni moliyalashtirishning muqobil manbalari yuzasidan topshiriq bergan.
Prezident, shuningdek, Vazirlar Mahkamasiga quyidagi yo‘nalishlarda takliflar kiritish vazifasini yukladi:
- 2023-yil 1-oktabrga qadar tovarlarni import qilish uchun litsenziya berish jarayonini avtomatlashtirish (raqamlashtirish) bo‘yicha;
- 2024-yil 1-yanvarga qadar transport xarajatlarini kompensatsiya qilish uchun subsidiya berish tizimini Jahon savdo tashkiloti talablariga moslashtirish.
Iyun boshlarida O‘zbekistonda Jahon savdo tashkiloti masalalari bo‘yicha maxsus vakil lavozimi joriy etilgandi. JSTga aʼzo bo‘lish jarayonini jadallashtirish, masʼul vazirlik va idoralar faoliyatining natijadorligini taʼminlash bo‘yicha ishlarni muvofiqlashtirish maxsus vakilning asosiy vazifalaridan biri hisoblanadi.
Tashkilotga a’zo bo‘lish O‘zbekistonga nima beradi?
O‘zbekiston JSTga a’zo bo‘lishdan bir necha jihatdan foyda ko‘rishi mumkin:
Yangi bozorlarga chiqish: JSTga a’zo bo‘lish orqali O‘zbekiston butun dunyo bo‘ylab kengroq bozorlarga chiqish imkoniyatiga ega bo‘ladi. Bu eksport hajmini oshirish va mamlakatda xorijiy sarmoyalarni ko‘paytirishga yordam beradi. Natijada iqtisodiy o‘sish oshadi va ko‘proq ish o‘rinlari yaratiladi.
Yaxshilangan savdo qoidalari: O‘zbekiston JST a’zosi sifatida xalqaro savdo qoidalari va talablariga rioya qilishi talab qilinadi. Bu mamlakatda ishbilarmonlik muhitini yaxshilash, savdo amaliyotida shaffoflikni oshirish va korrupsiyani kamaytirishga yordam berishi mumkin.
Intellektual mulkni himoya qilish: JST intellektual mulk huquqlarini himoya qilish uchun asos yaratadi, bu O‘zbekistonning o‘sib borayotgan texnologiya va ijodkorlik sanoati uchun muhimdir.
Nizolarni hal qilish: JST xalqaro savdo bilan bog‘liq nizolarni hal qilish uchun platformani taqdim etadi. Tashkilotga qo‘shilish orqali O‘zbekiston boshqa davlatlar bilan nizolarni adolatli va xolis hal etishga yordam beruvchi mexanizmdan foydalanish imkoniyatiga ega bo‘ladi.
Umuman olganda, JSTga a’zo bo‘lish O‘zbekistonning jahon iqtisodiyotiga to‘liqroq integratsiyalashuviga, savdo amaliyotini yaxshilashga va iqtisodiy rivojlanishga yordam beradi. Bu bo‘yicha muzokaralar so‘nggi yillarda ancha oldinga siljidi.
Iqtisodiyot va moliya vazirligi, Bojxona qo‘mitasi 2023-yil 1-noyabrga qadar tovarlarni “eksport” va “import” bojxona rejimlariga rasmiylashtirish uchun undiriladigan bojxona yig‘imlari stavkalarini Jahon savdo tashkiloti talablariga muvofiq birxillashtirish bo‘yicha takliflarni Vazirlar Mahkamasiga kiritadi.
Mazkur farmon 2024-yil 1-yanvardan, qonunchilikka o‘zgartirishlar esa 2025-yil 1-yanvardan kuchga kiradi.
