AQSh Kongressi Polshaga 96 ta Apache vertolyotlarini sotishni ma’qulladi

AQSH Kongressi Polsha qurolli kuchlariga 96 dona Apache vertolyotlarini sotishga ruxsat berdi. Bu haqda Polsha mudofaa vaziri Mariush Blashchak ma'lum qildi.

“Bizda Polshaga 96 ta Apache vertolyotlarini radarlar va qurollar bilan birga sotish uchun AQSH Kongressining bergan ruxsatnomasi bor” deb yozgan vazir ijtimoiy tarmoqdagi sahifasida.

Endilikda Polsha Mudofaa vazirligi vertolyotlar va ular uchun qurol-yarog‘larni qanday narxda sotilishi borasida muzokaralar olib bormoqda.

Mariush Blashchak avvalroq Amerikaning Apache vertolyotlari va Abrams tanklari yordamida Polshaning sharqiy chegarasida “yengib bo‘lmas qalqon” yaratish, ya’ni Brest darvozasini (Polsha-Belarus chegarasi) yopish mumkinligini aytgan edi. Yangi Apache vertolyotlari Polsha armiyasida xizmat qilayotgan Mi-24 vertolyotlarini almashtiradi.