Tayger Shroff, Aliya Bhatt va muvaffaqiyatga erishganidan so‘ng ota-onasiga uy sovg‘a qilgan boshqa Bollivud aktyorlari (foto)
Bollivud yulduzlari ham qimmatbaho narsalarni xarid qilishni yaxshi ko‘radi. Biroq ularning aksariyati saxovatpesha insonlar, o‘zlari uchun qimmatbaho narsalarni xarid qilmagan mashhurlar yaqinlari uchun qimmat narxlarda sovg‘a sotib olishadi. Quyida yaqinlariga uy sovg‘a qilgan Bollivud yulduzlari haqida ma’lumot beriladi.
Kangana Ranaut
Kangana Ranaut har doim oilasini birinchi o‘ringa qo‘yadi. Aktrisa singlisi Rangoli Chandel, akasi Akshat va ikki amakivachchasi uchun 48 ming 200 dollarga mulk sotib olgan.
“Men insonlarni o‘z boyliklarini oilasi bilan bo‘lishishga undamoqchiman. Unutmang, baxt baham ko‘rilganda ko‘payadi. Bu qurilayotgan chiroyli va hashamatli uylar 2023-yilgacha tayyor bo‘ladi, oilam uchun bu ishni qila olganimdan juda baxtiyorman”, — deydi aktrisa.
Tayger Shroff
Tayger Shroff yaqinda onasi Aisha uchun yangi uyga sarmoya kiritdi. Hozirda butun oila a’zolari yangi uyga ko‘chib o‘tgan. Hind aktyori Jeki Shroff intervyusida Tayger Bollivudga kirib kelganidan keyin onasi Aisha uchun uy sotib olish uning orzusiga aylanganini va o‘z maqsadi sari harakat qilganini aytgan.
Dipika Padukone
Dipika hayotidagi eng katta ahamiyatga ega bo‘lgan inson — otasi Prakash Padukonega qiymati 16 million dollarlik kvartirani sovg‘a qilgan. To‘rt xonali hashamatli kvartira Dipikaning o‘zi yashaydigan ko‘p qavatli uyning 30-qavatida joylashgan. Dipika oila a’zolari bilan yanada yaqinroq bo‘lish uchun uy sotib olishga qaror qilgan, uning yaqinlari har safar Mumbayga kelganida aktrisaga yaqin joyda yashaydi.
Aliya Bhatt
Aliya Bhatt intervyularining birida Londonda uyi bo‘lishini istashi, biroq bu uyni o‘ziga emas, onasi Sonya Razdan uchun sotib olish niyati borligi haqida gapirib bergan. Aktrisaning aytishicha, Sonya Britaniya poytaxtini yaxshi ko‘radi. Aktrisa 2018-yilda Londonning Kovent bog‘ida joylashgan ko‘chmas mulkni sotib olgan, bu hashamatli uydan hozirda Aliyaning o‘sha yerda yashovchi singlisi Shaxin foydalanmoqda.
