Qizlari bilan xalqaro terrorchilik tashkiloti jangarilari aʼzosi bo‘lgan o‘zbekistonlik ayol qidirilmoqda (video)
Ikki qizi bilan Suriyadagi xalqaro terrorchilik tashkiloti jangarilari aʼzosi bo‘lgan o‘zbekistonlik ayol qidirilmoqda. Bu haqda poytaxt IIBB axborot xizmati xabar berdi.
Xabarga ko‘ra, 1981-yilda Toshkent shahrida tug‘ilgan L.M. 2015-yilda Moskvada yashovchi D. ismli erkak bilan “Odnoklassniki”da tanishib qolgan. Erkak Rossiyada diniy erkinlik borligini aytib, uni Rossiyaga kelishga undagan. Shundan so‘ng ayol 2015-yil avgust oyida farzandlari bilan Rossiyaga yetib borgan.
U Moskva shahrida “jihodchilar” diniy ekstremistik oqimining aʼzosi bo‘lgan D. daʼvatlari asosida Ozarbayjon orqali Turkiyaga “hijrat” qilgan. Ushbu davlatdan aylanma yo‘llar orqali Suriyaga o‘tib, ISHID tarkibidagi “Hayʼat taxrir ash-sham” xalqaro terrorchilik tashkilotining jangarilariga borib qo‘shilgan.
Shuningdek, ayolning ikki qizi ham onasi bilan birgalikda mazkur xalqaro terrorchilik tashkilotining jangarilariga qo‘shilgan. Hozirda ularga nisbatan huquq tartibot idoralari tomonidan Jinoyat kodeksining 244-moddasi bilan jinoyat ishi qo‘zg‘atilib, qidiruv eʼlon qilingan.