Turkiyada o‘zbekistonlik fuqaro ikkinchi qavat balkonidan tushib ketdi
Turkiyaning Istanbul shahrida o‘zbekistonlik fuqaro ikkinchi qavat balkonidan tushib ketdi. Mamlakatning Istanbul shahridagi Bosh konsulxonasi hodisa yuzasidan ma’lumot berdi.
Unga ko‘ra, o‘zbekistonlik G.B.M. Istanbul shahrida o‘zi vaqtincha yashayotgan ko‘p qavatli uyning ikkinchi qavati balkonidan ehtiyotsizlik oqibatida tushib ketishi natijasida bel umurtqa sohasi va oyog‘i qattiq shikastlanib, Istanbul shahridagi Kartal Eğitim ve Araştırma Lütfü Kırdar kasalxonasida ikkita jarrohlik amaliyotini boshidan kechirgan.
Bosh konsulxona kasalxona rahbariyati bilan muzokaralar o‘tkazib, O‘zbekiston IIV Jamoat xavfsizligi departamenti va mahalliy diaspora vakillari bilan hamkorlikda moliyaviy jihatdan qiyin ahvolda qolgan ushbu fuqaroni maxsus avtomashinada kasalxonadan Istanbul aeroportiga olib borish va Istanbul—Urganch yo‘nalishidagi aviaqatnov orqali O‘zbekistonga jo‘natilishini taʼminladi.
