Qirg‘izistonda o‘zbekistonliklardan pul talab qilgan amaldor qo‘lga olindi (foto)
Qirg‘izistonda o‘zbekistonliklardan pul undirmoqchi bo‘lgan “Jayit qo‘mitasi” (Yaylovdan foydalanuvchilar uyushmasi ijroiya organi) raisi K.K qo‘lga olindi. Bu haqda Milliy xavfsizlik davlat qo‘mitasiga tayanib, Kaktus.media xabar berdi.
O‘zbekiston fuqarosi Qirg‘iziston Milliy xavfsizlik davlat qo‘mitasiga tovlamachilik bo‘yicha murojaat qilgan. U Ala-Bo‘ka tumani Ko‘k-Tosh qishloq okrugi “Jayit qo‘mitasi” raisiga nisbatan chora ko‘rishni so‘ragan.
Arizachi qirg‘izistonlik amaldor O‘zbekiston fuqarolariga tegishli to‘qqiz bosh qoramolni qonunga xilof ravishda ushlab, egalariga qaytarish uchun 2 ming dollar talab qilganini aytgan.
Milliy xavfsizlik qo‘mitasi ushbu holat yuzasidan tovlamachilik moddasi bo‘yicha jinoiy ish qo‘zg‘atgan. Ko‘p o‘tmay, gumonlanuvchi tovlamachilik summasining bir qismini – 1 ming AQSH dollarini olayotgan vaqtida qo‘lga olingan.
U ikki oy muddatga Milliy xavfsizlik davlat qo‘mitasining Jalolobod viloyatidagi vaqtinchalik saqlash izolyatoriga joylashtirilgan.
