Jo Bayden kelasi hafta BMTda chiqish qiladi

Oq uy AQSH prezidenti Jo Baydenning kelasi hafta Nyu-Yorkda bo‘lib o‘tadigan BMT Bosh assambleyasining 78-sessiyasidagi umumiy siyosiy muhokamada ishtirok etish, shuningdek, uning doirasida boshqa davlatlar rahbarlari bilan uchrashuvlar o‘tkazish rejasini tasdiqladi.

Oq uy matbuot kotibi Karin Jan-Pyerning ma’lum qilishicha, Amerika ma’muriyati rahbari 19—20-sentabr kunlari Nyu-Yorkda bo‘ladi.

“Prezident Bayden 19-sentabr kuni Bosh assambleyada nutq so‘zlashdan tashqari, xalqaro tinchlik va xavfsizlikka tahdidlarni bartaraf etish, global farovonlikni rag‘batlantirish va inson huquqlarini himoya qilish bo‘yicha hamkorlikni muhokama qilish uchun dunyo yetakchilari bilan ham uchrashadi”, dedi Jan-Pyer bayonotida.