Polsha 15-sentabrdan boshlab Ukrainadan g‘alla olib kirishni taqiqlaydi
Polsha Vazirlar Mahkamasi Yevropa Komissiyasining qaroridan qat’i nazar, 15-sentabrdan keyin Ukrainadan g‘alla olib kirishni taqiqladi. Bu haqda respublika qishloq xo‘jaligi vaziri Robert Telus ma’lum qildi.
“Qabul qilingan rezolyutsiya Yevrokomissiyaga qaror qabul qilishi uchun yuborilgan. Agar ular qaror qabul qilmasa, biz o‘zimiz qabul qilgan qarorimizni kuchga kiritamiz. Polsha-Ukraina iqtisodiy munosabatlari Yevropa Ittifoqi tomonidan tartibga solinmaguncha, Polshaga Ukrainaning to‘rt turdagi donining importi taqiqlanadi”, — dedi Telus.
Juma kuni Polsha bosh vaziri Mateush Moravetski Yevropa komissiyasiga Ukrainadan don importi masalasida ultimatum qo‘ydi. Uning ta’kidlashicha, Polsha Yevropa Ittifoqi qaroridan qat’i nazar, qishloq xo‘jaligi bozorlarining yangidan ochilishiga yo‘l qo‘ymaydi.
