Amerikalik ayol tasodifan AirPods Pro’ni yutib yubordi. Uning oshqozonidagi gadjet ishlashda davom etdi

Amerikalik Mo Kennedi ismli ayol uxlayotganida tasodifan AirPods Pro naushniklaridan birini yutib yubordi. G‘alati tush sifatida boshlangan voqea yarim tunda tez yordam bo‘limiga unutilmas sayohat bilan davom etdi.

Avvaliga ayol quloqchinni organizmidan chiqarib yuborishi uchun o‘zida qayt qilish istagini yuzaga keltirmoqchi bo‘lgan, biroq uning urinishlari natija bermagan. U xavfli vaziyat yuzaga kelmasdan oldin tez yordam chaqirishga qaror qilgan. Bemor bo‘linmaga yetib kelgach, shifokorlar vaziyat va yutib yuborilgan quloqchinning ishlashda davom etganidan hayratda qolgan. Kennedining onasi AirPods Pro’ga ulanib, qizining oshqozon tovushlari va kulgisini eshita olgan.

Kompyuter tomografiyasi tekshiruvi o‘tkazilgandan so‘ng, tibbiy guruh quloqchin tezda oshqozonga chuqurroq kirib ketganini va xavfli holatda qolib ketganini aniqladi. Muammo invaziv jarrohlik amaliyotigacha yetib borishi haqida xavotirlar bo‘lganligi sababli shifokorlar shoshilinch endoskopiya o‘tkazishga qaror qildi.

Narkoz olgan bemorning organizmidagi begona jismni olib tashlash jarayoni muvaffaqiyatli o‘tdi. Kennedi uyg‘onganida, quchog‘ida ichiga quloqchin solingan idishni ko‘rgan. U tibbiyot xodimlariga minnatdorchilik bildirgan.

“Umuman olganda, men 100 foiz AirPods Pro’ni tavsiya qilaman, biroq 1000 foiz ularni yeyishni tavsiya etmayman. Ahvolim yaxshi ekanligidan xursandman va quloqchinlarning kamida 9 soat davomida oshqozon kislotasiga chidamliligini tasodifan sinab ko‘rganimdan mamnunman”, — deydi Mo Kennedi.

Bu oxirgi yillardagi birinchi holat emas. Yaqinda yana bir ayol AirPods Pro’ni vitamin deb adashib yutib yuborgandi.