Oleksandr Usik va Tayson Fyuri o‘rtasida mutlaq chempionlik jangi uchun shartnoma imzolandi 

Professional boksning super og‘ir vazn toifasida WBA Super, IBF, WBO va IBO kamarlari sohibi Oleksandr Usik va WBC chempioni Tayson Fyuri o‘rtasida mutlaq Jahon chempionligi uchun jang qiladi.

Bokschilar o‘rtasida jang uchun shartnoma imzoladi. Jang Saudiya Arabistonida bo‘lib o‘tadi. Bu haqida mamlakatning ko‘ngilochar ishlar bosh boshqarmasi raisi Turki Alalshih ma’lum qildi. 

“Bu ko‘pdan beri hamma ko‘rishni istagan jang — nihoyat ikki jahon chempioni ringda uchrashadi. Bu boks tarixidagi eng yirik jang. Biz uni tashkil etishda ishtirok etganimizdan faxrlanamiz”, — deydi Alalshih.

Xabarga ko‘ra, jang 2023-yilning oxiri yoki 2024-yilning yanvar oyida bo‘lib o‘tadi. 

Eslatib o‘tamiz, Oleksandr Usik so‘nggi jangini avgust oyida Daniel Dyubuaga qarshi o‘tkazib, 9-raundda texnik nokaut evaziga g‘alaba qozongandi.  

Tayson esa Derek Chisorani mag‘lub etib, faoliyatidagi 33-g‘alabani qo‘lga kiritgandi.