“Rossiya qo‘shinlari Xarkovdagi kafe-do‘konga raketa hujumi uyushtirdi: 48 kishi, jumladan, 6 yoshli bola halok bo‘ldi” — Zelenskiy
Rossiya qo‘shinlari Xarkov viloyatining Kupyanskiy tumanidagi kafe-do‘konga raketa hujumi uyushtirdi, oqibatda 47 kishi halok bo‘ldi, deya ma’lum qildi Ukraina prezidenti Vladimir Zelenskiy Telegram’dagi kanalida.
“Rossiya terroriga chek qo‘yish kerak. Rossiyaga sanksiyalarni chetlab o‘tishga yordam beradigan har bir odam jinoyatchidir. Rossiyani hozirgacha qo‘llab-quvvatlagan har bir odam yovuzlikni qo‘llab-quvvatlamoqda. Rossiyaga bu va shunga o‘xshash teraktlar faqat bitta maqsadda kerak: o‘zining genotsid agressiyasini butun dunyo uchun yangi normaga aylantirish. Hayotni asrashda bizni qo‘llab-quvvatlayotgan har bir rahbarga, har bir insonga minnatdorchilik bildiraman!” — dedi u.
Xarkov viloyati harbiy boshqarmasi boshlig‘i Oleg Sinegubovning aniqlik kiritishicha, Rossiya qo‘shinlari Kupyanskiy tumani Groza qishlog‘idagi kafe va do‘konga zarba bergan.
“Hozirgi vaqtda vayronalar ostidan 48 nafar halok bo‘lganlarning jasadi chiqarildi, ular orasida olti yoshli bola ham bor. Yana olti kishi, jumladan, bir bola jarohatlangan. Shifokorlar ularga zarur yordam ko‘rsatmoqda”, — dedi Sinegubov.
