Shavkat Mirziyoyev Rossiya hukumati raisining o‘rinbosari bilan uchrashdi
Rossiyaga rasmiy tashrif doirasida Shavkat Mirziyoyev Qozon shahridagi “Kazan Ekspo” markazida ochilgan Tatariston sanoat salohiyati ko‘rgazmasiga tashrif buyurdi. Bu haqda Prezident matbuot xizmati xabar berdi.
Davlat rahbariga Rossiya hukumati raisining o‘rinbosari — sanoat va savdo vaziri Denis Manturov va Tatariston Raisi Rustam Minnixanov hamrohlik qildi. Kecha shu yerda uchinchi O‘zbekiston-Rossiya hududlararo hamkorlik forumi bo‘lib o‘tdi. Prezidentga ushbu tadbir yakunlari to‘g‘risida batafsil axborot berildi.
O‘zbekiston yetakchisi Tataristonning yetakchi korxonalari sanoat mahsulotlari va texnologiyalari bilan tanishdi. Ko‘rgazma doirasida Rossiya Hukumati raisining o‘rinbosari — sanoat va savdo vaziri Denis Manturov bilan uchrashuv bo‘lib o‘tdi. Navbatdagi O‘zbekiston va Rossiya hududlari forumida erishilgan kelishuvlarni, eng avvalo, sanoat kooperatsiyasi loyihalarini amalga oshirish masalalari ko‘rib chiqildi.
