Erdo‘g‘on Isroilni o‘zini tashkilot sifatida emas, balki davlat sifatida tutishga chaqirdi

Turkiya prezidenti Rajab Toyyib Erdo‘g‘on Falastin—Isroil keskinlashuvi fonida Tel-Avivni o‘zini tashkilot sifatida emas, balki davlat sifatida tutishga chaqirdi.

“Isroil esda tutishi kerakki, agar u o‘zini davlat kabi emas, balki tashkilot kabi tutsa, oxir-oqibat unga tashkilotdek munosabatda bo‘lishadi”, — dedi Turkiya rahbari Anqarada o‘tgan yig‘ilishda.

Unga ko‘ra, Turkiya Isroil hududida tinch aholining o‘ldirilishiga qarshi.

“Shu bilan birga, biz G‘azoda ham begunoh odamlarning o‘ldirilishini qabul qila olmaymiz”, — dedi Turkiya prezidenti.

Kecha 10-oktyabr kuni Yevropa Ittifoqi diplomatiyasi rahbari Josep Borrel Isroilga mudofaani tashkil qilishda xalqaro gumanitar huquq tamoyillariga rioya qilish zarurligini eslatib o‘tgandi.