Tbilisida Isroilni qo‘llab-quvvatlash bo‘yicha miting bo‘lib o‘tdi

Gruziya poytaxti Tbilisida Isroilni qo‘llab-quvvatlash bo‘yicha miting bo‘lib o‘tdi. Unda yuzlab odamlar, jumladan, Gruziyada yashovchi yahudiylar ishtirok etgan.

Namoyishchilar HAMASning Isroilga hujumini qoraladi va qurbonlar xotirasini bir daqiqalik sukut bilan yod etdi.

Gruziyada faoliyat yurituvchi Isroil uyi asoschisi Isik Moshe aksiyani Gruziya fuqarolari tashkil qilganini qayd etdi.

“Butun Gruziya xalqi Isroilni qo‘llab-quvvatlab, terrorizmga qarshi norozilik bildirmoqda. Biz Isroil palatasi vakillari sifatida ko‘plab tashkilotlarga HAMASga terrorchi tashkilot maqomini berishni so‘rab maktub yo‘lladik. Agar birgalikda shu yo‘ldan borsak, biz dunyoni terrorchilardan tozalaymiz”, — dedi u.