Jo Bayden AQSH har doim Isroil tomonida bo‘lishini ma’lum qildi
AQSH prezidenti Jo Bayden Tel-Avivda Isroil bosh vaziri Binyamin Netanyaxu bilan uchrashdi.
“Amerika Qo‘shma Shtatlari erkinlikni himoya qilish, adolatga erishish va tinchlikni qo‘llab-quvvatlash uchun siz tomonda. Bugun, ertaga va har doim siz bilan birga bo‘lishga va’da beramiz”, — dedi Amerika prezidenti Isroil bosh vaziriga.
Uning qo‘shimcha qilishicha, Vashington “tinch aholi orasida fojialarning oldini olish uchun” Isroil va mintaqadagi hamkorlari bilan ishlashda davom etadi.
Bayden Yaqin Sharqdagi mojaroning keskinlashuvi fonida bugun Isroilga tashrif bilan keldi. Times of Israel nashrining yozishicha, Baydenning Netanyaxu bilan uchrashuvi bir soatdan ortiq davom etgan.
Isroil bosh vaziri tinch aholi G‘azo sektoridagi “qonuniy terror nishonlariga” qilingan hujumlardan aziyat chekayotganini tan oldi. Uning qo‘shimcha qilishicha, Isroil tinch aholini “xavfsiz hududlarga evakuatsiya qilishga” chaqirishda davom etadi.
