O‘zbekistonda avtomobil kuzovi yoki uning detallari rangini o‘zgartirganlik ma’muriy javobgarlikka asos bo‘lmaydi
O‘zbekistonda avtomobilning old kapoti hamda yon tomon ustunlariga qora rangli qoplama yopishtirganligi natijasida YPX xodimlari tomonidan jarima jazosi qo‘llanilib, mashina vaqtincha ushlab turilgani ko‘plab muhokamalarga sabab bo‘ldi. Adliya vazirligi bu qonunchilik normalariga zid ekanini bildirdi.
Adliya vazirligi mazkur holatda xodimlarning fuqaroga nisbatan ma’muriy jazo chorasi qo‘llash bilan bog‘liq harakatlari qonunchilik normalariga zid hisobladi va buni izohlab berdi.
Avtotransport vositalarini qayta jihozlash bilan bog‘liq masalalar Vazirlar Mahkamasining 2022-yil 22-fevraldagi 86-son qarori bilan tasdiqlangan Maxsus elektron tizim orqali ruxsat etish xususiyatiga ega ayrim hujjatlarni berish tartib-taomillari to‘g‘risida yagona nizomning 26-ilovasiga muvofiq Avtotransport vositalarini qayta jihozlash uchun ruxsatnoma pasportida ko‘rsatib o‘tilgan.
Konstitutsiyaning 20 va 55-moddalariga ko‘ra davlat organlari tomonidan insonga nisbatan qo‘llaniladigan huquqiy ta’sir choralari mutanosiblik prinsipiga asoslanishi va qonunlarda nazarda tutilgan maqsadlarga erishish uchun yetarli bo‘lishi kerak. Inson bilan davlat organlarining o‘zaro munosabatlarida yuzaga keladigan qonunchilikdagi barcha ziddiyatlar va noaniqliklar inson foydasiga talqin etiladi.
Har kim davlat organlarining yoxud ular mansabdor shaxslarining qonunga xilof qarorlari, harakatlari yoki harakatsizligi tufayli yetkazilgan zararning o‘rni davlat tomonidan qoplanishi huquqiga ega.
Shunga ko‘ra, Adliya vazirligi kelgusida yuqoridagi holatlarni oldini olish maqsadida 2023-yil 17-oktyabrda IIVga taqdimnoma kiritdi.
