Yevrokomissiya Ukrainaga makromoliyaviy yordam doirasida yana 1,5 milliard yevro ajratdi
Yevrokomissiya Ukrainaga mamlakat infratuzilmasini tiklash uchun 1,5 milliard yevro miqdorida yana bir transh ajratilishini e’lon qildi. Bu haqda YK rahbari Ursula fon der Lyayen ma'lum qildi.
“Yevropa komissiyasi Ukrainaga 1,5 milliard yevro miqdorida makromoliyaviy yordam o‘tkazdi. Ukrainaga bergan yordamimiz hajmi 83 milliard yevroga yetdi. Biz Ukraina tomonida harakat qilishda davom etamiz va 2027-yilgacha yana 50 milliard yevro ajratamiz”, — dedi fon der Lyayen o‘z bayonotida.
Ukrainaga makromoliyaviy yordam ajratish 2022-yil dekabrida kelishilgan edi. Dastur doirasida Kiyevga har oyda 1,5 milliard yevro yuboriladi. YK tomonidan tushuntirilganidek, mablag‘lar imtiyozli kreditlar ko‘rinishida taqdim etiladi, ularni to‘lash uchun Ukraina hukumati 2033-yildan boshlab 35 yil muddatga ega bo‘ladi.
2023-yil iyul oyi oxirida Yevropa Ittifoqi tashqi siyosat xizmati rahbari Josep Borrel Yevropa Ittifoqi tashqi ishlar vazirlari muhokamasiga Ukrainaga qurol yetkazib berishni ko‘paytirish maqsadida Yevropa tinchlik jamg‘armasi resurslarini kengaytirish rejasini taqdim etishga va’da berdi.
