Kuz mavsumida bolalar salomatligini saqlash uchun nimalarga e’tibor berish kerak?
Shamollash va infeksion kasalliklar, ayniqsa, kuz va qishki mavsumda ko‘p kuzatiladi. Bunday vaqtda bolalarning immuniteti mustahkam bo‘lishi muhim sanalgani sabab ham ota-onalarga bu borada asqatadigan tavsiyalarni berib o‘tamiz.
Sovuq kunlarda bolaning salomatligini saqlash uchun nima qilish kerak?
Jismoniy tarbiya
Individual qarshi ko‘rsatmalar bo‘lmasa, doimiy ravishda jismoniy tarbiya bilan shug‘ullanish kerak. Mutaxassisning ko‘rsatmasi va bolaning xohishidan kelib chiqib, tonggi toza havoda bajarilgan mashqlar vaqt o‘tkazishning eng yaxshi usuli hisoblanadi.
Shaxsiy gigiyena qoidalariga rioya qilish
Bolaga shaxsiy gigiyena qoidalariga rioya qilish, qo‘llarni muntazam ravishda yuvish kerakligini o‘rgatish, shu bilan birga, ota-onaning o‘zi ham bu borada o‘rnak bo‘lishi kerak. Chunki bolalar aksariyat hollarda ota-onasiga taqlid qiladi. Shuningdek, shaxsiy idishi, kiyimi, tarog‘i, tish cho‘tkasi va sochig‘i bo‘lishi zarurligi, boshqalarnikidan foydalanmasligi kerakligini o‘rgating.
Kun tartibi bo‘lishi kerak
Bolaning uyqusi me’yorda bo‘lishiga e’tibor bering. Tiniqib uxlamaslik organizmni susaytirib, kasallik xavfini orttirishi mumkin.
Stressning oldini olish
Bu mavsumiy shamollashga sabab bo‘ladigan yana bir muhim omil sanaladi. Dam olishi, ijodkorona o‘yinlar uchun yetarlicha vaqt bo‘lishiga e’tibor bering.
Suyuqlik balansi me’yorda bo‘lishiga e’tibor qarating
Bolaning kun davomida qancha suyuqlik ichishi kerakligi yoshi, salomatligi qandayligi va mutaxassis bilan maslahatlashib aniqlash kerak bo‘lgan bir qancha omillarga bog‘liq bo‘ladi.
Nordon sutli ichimliklar
Prebiotiklar bola salomatligi uchun foydali. Tabiiy sutdan tayyorlangan ichimliklar ichaklar mikroflorasini yaxshilashga yordam beradi. Prebiotik va probiotiklarni vitamin va minerallar bilan umumlashtirish esa yanada yaxshi samara berib, hazm jarayonini ham me’yorlashtiradi.
Sut fermadan olinib, to nordon sutli mahsulotlarga aylanguniga qadar bir necha tekshiruvlardan o‘tgan bo‘ladi. Ishlab chiqarishda tayyor bo‘lgan mahsulotlar aseptik sharoitda sterillangan germetik idishlarga solinadi. Shu sabab ham bolalar uchun mo‘ljallangan bunday mahsulotlar uyda tayyorlanganidan ko‘ra uzoqroq saqlanishi mumkin bo‘ladi. Xarid davomida ota-onalar qadoqni yaxshilab ko‘zdan kechirishi, teshik yoki shish borligi kuzatilsa, sotib olmasligi kerak. Shuningdek, bolaga berishdan avval mahsulot ta’mini ko‘rish ham maqsadga muvofiq. Sut va sutli mahsulotlarda suyaklarning sog‘lom o‘sishi uchun muhim bo‘lgan mineral moddalar, xususan, kalsiy bisyor bo‘ladi.
To‘g‘ri tanlangan sharbat, mors va kisel
Bola ratsioniga to‘g‘ri tanlangan sharbat, mors, kisel va sharbatni o‘z ichiga oladigan ichimliklarni qo‘shsa bo‘ladi. Ular bola organizmi uchun muhim bo‘lgan bir qator moddalarni o‘z ichiga olishi mumkin. Bolalarga mo‘ljallangan ichimliklarda mineral moddalar, kletchatkalar, organik kislotalar mujassam bo‘ladi. Kisel esa hazm jarayonini yaxshilashi bilan o‘ziga xosdir.
Bolaning salomatligini yana qanday qilib yaxshilash mumkin?
Organizmning himoya kuchini mustahkamlash uchun to‘g‘ri ovqatlanish, ratsionda salomatlik uchun foydali bo‘lgan dukkakli mahsulotlar, sabzavot, mevalar, baliq, go‘sht mahsulotlari hamda tuxum bo‘lishi muhim. Vitaminli qo‘shimchalar va immunitetni mustahkamlaydigan boshqa medikamentlarni esa mutaxassis tavsiyasiga ko‘ra qabul qilish kerak bo‘ladi.
