Tailandda “suzuvchi poyezd” ishga tushirilmoqda
Tailandda sayyohlar orasida mashhurlik qozongan “suzuvchi poyezd” ishga tushirilmoqda va uning uchun chiptalar sotuvi boshlandi. Bu haqida Tailand Davlat temiryo‘llari tashkiloti maʼlum qildi.
Poyezd Bangkok shahridan yo‘lga chiqadi va poytaxtdan 150 kilometr uzoqlikda joylashgan Lopburi viloyatidagi Pasak Jolasid to‘g‘onigacha boradi. Ushbu yo‘nalishdagi qatnovlar har yili quruq va sovuq mavsumda yo‘lga qo‘yiladi. Joriy yildagi ilk poyezd 4-noyabr kuni yo‘lga chiqsa, so‘nggi poyezd 28-yanvar kuni yo‘lovchilarni o‘z manziliga eltadi.
Poyezd chiptasi narxi vagon sinfi va yo‘lovchining ortga qaytish yoki qaytmasligiga bog‘liq. Eng arzon chipta narxi 150 bat (4 dollar) bo‘lsa, eng qimmatining narxi 590 bat (16 dollar) gacha boradi.
Poyezdni “suzuvchi” deb atashlariga sabab sayohat vaqtida yo‘lovchi o‘zini suv ustidan yurib borayotgandek his qilishidir. Sayyohlar “suzuvchi” poyezdda manzilga yetib olgach, Lopburi viloyatining diqqatga sazovor maskanlarini ko‘zdan kechirishadi.
