Karmana tumani hokimi, prokurori, departament boshlig‘i, ichki ishlar, elektr tarmoqlari rahbarlari ishdan olindi
Prezident huzurida o‘tkazilayotgan yig‘ilishda energetika tizimining kuz-qish mavsumiga tayyorligi ko‘rib chiqildi.
So‘nggi besh yilda tarmoq va transformatorlarni modernizatsiya qilishga 4 trillion so‘mdan ziyod mablag‘ ajratilgani taʼkidlandi.
Lekin ayrim viloyat hokimlari o‘zlari harakat qilib, mahallalarda transformator va tarmoqlarni yaxshilashga, kuz-qishni betalafot o‘tkazish uchun mablag‘lar, transformator, sim va boshqa ehtiyot qismlar zaxirasini shakllantirishga yetarli eʼtibor qaratmayotgani ko‘rsatib o‘tildi.
Umuman, hududlardagi 33 mingta transformator, 122 ming kilometr elektr tarmoqlari eskirgan, oqibatda ishlab chiqarilgan elektrning 12 foizi yo‘qotilgan. 20 ta tumanda elektr yo‘qotishlari hajmi respublika ko‘rsatkichidan 1,5 barobar yuqori.
Shu munosabat bilan Energetika vazirligiga hududlarda eskirgan transformator va tarmoqlarni yangilash bo‘yicha uch yillik dastur ishlab chiqish, viloyat hokimlari va prokurorlariga dasturni amalga oshirish yuzasidan topshiriqlar berildi.
2026-yilga borib jami yo‘qotishlar hajmini 8 foizga tushirish shartligi taʼkidlandi.
Mamlakatimizdagi elektr ulgurji isteʼmolchilarining 28 foizi avtomatlashgan tizimga (ASKUE) ulanmagani qayd etildi. Yoki, aqlli hisoblagichlar o‘rnatilgani bilan, 170 mingdan ziyod abonentlarning avtomatlashgan tizim bilan aloqasi yo‘q.
Soha mutasaddilariga barcha ulgurji isteʼmolchilarni ASKUE tizimiga ulash topshirildi.
Joriy yilda hududlarda 3,5 milliard kilovatt-soat elektrdan noqonuniy foydalanish holatlari aniqlangani taʼkidlandi.
Misol uchun, Karmanadagi qurilishi yakunlanmagan binoda 452 ta “mayning” qurilmasi o‘rnatilgani oqibatida o‘n oy davomida qariyb 5,5 million kilovatt-soat elektrdan noqonuniy foydalanilgan.
Karmana tumani hokimi, prokurori, departament boshlig‘i, ichki ishlar, elektr tarmoqlari rahbarlari o‘n oyda hududda shuncha elektrdan o‘g‘irlikni payqamagani, tumanda oylik isteʼmol birdaniga 5 foizga oshganini tahlil qilmagani tanqid qilindi.
Ushbu rahbarlarning barchasi ishdan olinishi belgilandi, Bosh prokuraturaga ularning harakatiga baho berib, qonun ustuvorligini taʼminlash topshirildi.
Mutasaddilarga o‘g‘irliklar eng yuqori bo‘lgan hududlarda noqonuniy isteʼmolga sabab bo‘layotgan omillarni aniqlab, ularni bartaraf qilish bo‘yicha tizim yaratish vazifasi qo‘yildi.
