Xorazmdagi maktabda o‘qituvchi dars payti o‘quvchini ayovsiz kaltakladi (video)
Xorazmning Bog‘ot tumanidagi maktabda o‘qituvchi dars payti o‘quvchini ayovsiz kaltaklagani aks etgan video ijtimoiy tarmoqlarda tarqalgandi. Viloyat maktabgacha va maktab ta’limi boshqarmasi o‘qituvchi ishdan olinganini ma’lum qildi.
Qayd etilishicha, holat Bog‘ot tumanidagi 2-IDUMda 30-oktyabr kuni sodir bo‘lgan. Tarix fani o‘qituvchisi Q.H. 9-sinf o‘quvchisi M.B.ni qayta-qayta ogohlantirishiga qaramasdan, dars mashg‘ulotiga tayyorgarliksiz kelgani uchun kaltaklagan. Holat sinfdagi o‘quvchi tomonidan tasvirga olinib, ijtimoiy tarmoqqa joylangan.
“Bugungi kunda ushbu xodim bilan tuzilgan mehnat shartnomasi uning xohishiga ko‘ra bekor qilinganini ma’lum qilamiz”, — deyiladi viloyat maktabgacha va maktab ta’limi boshqarmasi xabarida.
Ayni paytda Bog‘ot tumani ichki ishlar bo‘limi tomonidan holat yuzasidan tergovga qadar surishtiruv ishlari olib borilmoqda.
Bola huquqlari bo‘yicha vakil ham holatga munosabat bildirib, o‘qituvchi tomonidan bolaga nisbatan bunday noma’qul muomalada bo‘lishi, uni urishi, tahqirlashiga hech bir holatda mutlaqo yo‘l qo‘yib bo‘lmasligini, bu borada bolaning manfaatlarini himoya qilish yuzasidan zarur bo‘lgan barcha choralar ko‘rilishini ma’lum qildi.
