Mirzaobod tumani va Shirin shahriga yangi hokimlar tayinlandi
Xalq deputatlari Mirzaobod tumani kengashining navbatdan tashqari sessiyasida Sirdaryo viloyati hokimi Akmal Mahmudaliyev, tuman kengashi deputatlari, sektorlar, tashkilot va korxonalar rahbarlari ishtirok etdi. Bu haqda viloyat hokimligi matbuot xizmati xabar berdi.
Sessiyada Akmal Mahmudaliyev tuman hokimi lavozimiga ayni kunga qadar Shirin shahar hokimi lavozimida ishlab kelayotgan Sarvar Sultonov nomzodini tavsiya etgan.
Ovozga qo‘yish natijalariga ko‘ra, Sarvar Sultonov Mirzaobod tumani hokimi etib tasdiqlangan.
Sessiya davomida, shuningdek, tumanda iqtisodiyot, tadbirkorlik, sanoat, qishloq xo‘jaligi, ijtimoiy sohani rivojlantirish, aholiga munosib turmush sharoiti yaratish borasidagi ishlar tahlil qilinib, kelgusidagi ustuvor vazifalar belgilab olingan.
Xalq deputatlari Shirin shahar kengashining navbatdan tashqari sessiyasida esa Niyoz Xazratqulov shahar hokimi lavozimiga tasdiqlandi.
Tayinlovga qadar u “Turonbank” aksiyadorlik tijorat banki Guliston filiali boshqaruvchisi lavozimida faoliyat yuritib kelayotgandi.
Avvalroq Qishloq xo‘jaligi vaziri o‘rinbosari Sayxunobod tumani hokimi etib tayinlangani to‘g‘risida xabar berilgandi. Shuningdek, vazir o‘rinbosari Nishon tumaniga, Nishon hokimi esa Muborak tumaniga hokim bo‘ldi, Dehqonobod hokimi Zoir Aliqulov Qarshi tumani hokimi sifatida ish boshladi.
