Onix’ning sotuvda yo‘q modellari qimmatlashdi. Ular tez kunda sotila boshlashi mumkin
UzAutoMotors besh pozitsiyadagi Chevrolet Onix avtomobillarining narxlarini oshirdi. Ammo hozir ular sotuvda mavjud emas.
Foto: “Daryo” / Madina Nurman
“Chevrolet.uz” saytidagi yangilangan maʼlumotlarga qaraganda Onix narxlari 19 foizgacha oshirilgan. Xususan, Chevrolet Onix LS MT narxi 176,9 million so‘m ko‘rsatilgan. Avtomobil avval 149 million so‘mdan sotilgan.
Saytda Chevrolet Onix 1LT MT narxi 180,8 million so‘m (oldingi narx 155 million so‘m), Chevrolet Onix 4LT LTZ Turbo AT narxi esa 199,9 million so‘m (eski narx 185 million so‘m) ko‘rsatilgan.
Shu bilan birga, Chevrolet Onix Premier 1 narxi 207,3 million so‘mdan 211,9 million so‘mgacha, Chevrolet Onix Premier 2 narxi 214,7 million so‘mdan 219,6 million so‘mgacha qimmatlashgan.
Hozircha kompaniya sotuvda yo‘q mazkur modellar narxi oshirilgani bo‘yicha rasmiy izoh bermadi.
Ayni paytda Chevrolet Onix 3LT MT 184,8 million so‘mdan, Chevrolet Onix Premier 2 Turbo AT Plus 221,6 million so‘mdan, Chevrolet Onix Turbo redline 230,6 million so‘mdan sotuvda mavjud. Kompaniya ilovasida mazkur avtomobillarga navbatlar 2024-yilning yanvar va fevral oylarida kelishi ko‘rsatilgan.
Iqtisodchi Otabek Bakirov Telegram’dagi kanalida narxlar oshirilishi yuzasidan munosabat bildirdi.
“Monopolist UzAutoMotors avtomobillar pozitsiyalar narxini bu haqda rasmiy xabar bermasdan turib oshirish yo‘lini tutganga o‘xshaydi. Vakolatsiz, buning ustiga rahbarsiz qolgan Raqobat qo‘mitasi monopolistning o‘zbekistonliklar ustidan o‘tkazishni boshlagan mazkur tajribasiga biron bir munosabat bildirgani yo‘q. Isteʼmolchilar narxlar oshganini oldingi va kompaniya saytidagi joriy narxlarni solishtiribgina bilishlariga to‘g‘ri kelmoqda. Taʼkidlash lozimki, sanalgan pozitsiyalarning birontasi ochiq sotuvda yo‘q (alohida kelishib, topsa bo‘ladi)”, — deya fikr bildirgan iqtisodchi.
Otabek Bakirovning yozishicha, narxlar oshirilganiga qaraganda tez kunda sotuvlar boshlanishi ham mumkin.
“Oktyabrda Chevrolet Onix 3LT MT pozitsiyasining narxi 26 million so‘mga oshirilgach, 184,8 million so‘m narx bilan kontaktatsiyalar ochilgandi (2024-yil iyunga shartnoma tuzish mumkin). Ehtimolki, narxlari oshgan pozitsiyalar ertadan sotuvda paydo bo‘lib qolishi mumkin. Esda tutingki, endi Lacetti’dan arzon Onix rasman yo‘q. Tajribaxonaga aylantirilgan, bozor deyishga til bormaydigan tanlovsiz muhitimizni Qozog‘iston bilan solishtiring. Qardosh qo‘shnilarda o‘zimizning Chevrolet Onix 0 foiz badal bilan 7 yilga bo‘lib to‘lashga berilmoqda”, — deb yozgan u.
Joriy yilning 26-mayida eʼlon qilingan maqolamizda Onix Premier 1 va Premier 2 sotuvi boshlangani, o‘shanda mazkur rusumdagi avtomobillar uchun 1 ming 171 ta navbat mavjudligi va mashina tayyor bo‘lishini 1 yil kutish kerakligi keltirilgan.
Maʼlumotlarga ko‘ra, 2023-yilda jami 80 ming dona Onix avtomobili ishlab chiqarish rejalashtirilgan. Statistika agenligi xabari berishicha, UzAutoMotors joriy yilning 9 oyi davomida 22 082 ta Onix avtomobili ishlab chiqargan.
Eslatib o‘tamiz, kompaniya Tracker va Onix 2023-yildan Spark va Nexia o‘rniga ishlab chiqarilishini maʼlum qilgan. Onix birinchi marta sotuvga chiqqan 2022-yil 1-noyabr kuni avtomobil uchun rekord darajadagi — 28 mingdan ortiq shartnoma imzolangan va navbatlar bir yilgacha cho‘zilgandi. Dastlab Onix 9-12 ming dollar atrofida sotilishi xabar qilingan. Ammo joriy yilning may oyi boshida shartnomalar to‘xtatilgunga qadar avtomobil 18 ming dollardan sotilgan.
