Bozordagi narxlar: uzum keskin qimmatlashdi, pomidor narxi ham sezilarli oshdi

Iqtisodiyot va moliya vazirligi “Qo‘yliq” va “Chorsu” dehqon bozorlarida qishloq xo‘jaligi mahsulotlarining 13-noyabrdagi ulgurji narxlari haqida maʼlumot berdi.

Bunda pomidorning maksimal narxi o‘tgan haftadagisidan 5 000 so‘m qimmaroq (avvalgi narx 20 000 so‘m edi) ekanini ko‘rish mumkin. Yaʼni “Qo‘yliq”da bir kilo pomidor 25 000 so‘mgacha bo‘lgan narxda sotilmoqda.

Vazirlik axborotiga ko‘ra, bir hafta davomida “Chorsu”da mol va qo‘y go‘shtlarining narxlari o‘zgarmagan — mol go‘shtining kilosi 60 000–70 000 so‘m, qo‘y go‘shti 65 000–70 000 so‘m sotilmoqda. Mazkur bozorda Lazer guruchining kilosini 18 000–25 000 so‘m oralig‘ida, no‘xatni 18 000–20 000 so‘mdan, qizil loviyani 15 000–17 000 so‘m, moshni 10 000–12 000 so‘mdan xarid qilish mumkin.

“Qo‘yliq”da kartoshkaning bir kilosi narxi 200 so‘m qimmatlab, maksimum 4 200 so‘mdan sotilmoqda. Shu bilan birga, piyozning kilosi 1 200–2 200, sabzi 1 200–2 000 so‘m.

Sabzavotlardan bodring kilosi 4 000–9 000 so‘m, bulg‘or qalampiri 2 000–4 000 so‘m, baqlajon 1 800–2 000 so‘m.

Mevalardan bananning kilosi 18–23 ming so‘m, olma 4 000–18 000 so‘m, nok 19 000–40 000 so‘m (narxi o‘zgarmagan). Ammo uzum va anor narxlari qimmatlashgani ko‘rinadi. Masalan, o‘tgan hafta uzumning kilomi maksimum 45 000 so‘mgacha, anor esa 23 000 so‘mgacha sotilgandi. Bu hafta boshida esa uzumning kilosi 90 000 so‘mgacha ko‘tarildi, anor narxi 35 000 so‘mgacha chiqdi.

Vazirlik “Qo‘yliq” bozorida 28 turdagi meva, sabzavot, dukkakli va guruch mahsulotlari narxlari bo‘yicha maʼlumotlar ertalab soat 5:00 dan 7:00 ga qadar o‘rganilganini qayd etgan. “Chorsu” bozorida mol va qo‘y go‘shti narxlari bo‘yicha maʼlumotlar ertalab soat 5:00 va 8:00 oralig‘ida yig‘ilgani eslatilgan.