Banklarda so‘mdagi kredit foizlari aholi uchun sezilarli oshdi
Markaziy bank 2023-yilning o‘tgan davrida kredit foizlari qanday o‘zgargani bo‘yicha infografika eʼlon qildi.
Xususan, noyabr oyida aholiga ajratilgan so‘mdagi kreditlar foizlari joriy yildagi eng yuqori darajaga yetib, 25,1 foizni tashkil qildi. Tadbirkorlar uchun kreditlar esa 22,5 foizdan ajratilgan.
Infografikaga ko‘ra, kreditlar yanvar oyida aholiga 22,9 foizdan (11 oyda 2,2 foiz o‘sgan), biznesga 22 foizdan (0,9 foiz o‘sgan) berilgan.
Aholiga chet el valyutasidagi bank kreditlari qisqa muddatga 9,6 foizdan, uzoq muddatga 9,6 foizdan ajratilgan.
Avvalroq Markaziy bank raisi mamlakat aholisi kreditni asosan nimaga olayotganini ochiqlagandi.
“So‘rov natijasida aholida avtokreditlar, mikroqarz, mikrokredit hamda ipoteka kreditlariga talab yuqori ekani aniqlandi”, — degan Mamarizo Nurmurodov.
Shu bilan birga, “O‘zbekiston-2030” strategiyasida kelgusi 7 yil ichida kredit foizlarini 10-12 foizgacha pasaytirish belgilangani xabar qilingan.
Ma’lumot uchun, respublikada 2013-yilning iyul oyida banklardagi kredit foiz stavkalari 15,8 foiz bo‘lgan. Joriy yilda esa bu ko‘rsatkich 25 foizdan oshmoqda.
