O‘zbekistonning oltin-valyuta zaxirasi bir oyda 1,6 mlrd dollardan ortiqqa oshdi
O‘zbekistonning rasmiy zaxira aktivlari dekabr oyida 1,6 milliard dollarga oshib, 2024-yil 1-yanvar holatiga ko‘ra, 34 milliard 564,7 million dollarni tashkil etmoqda. Bu haqda Markaziy bank ma’lumotlarida keltirilgan.
Ma’lum qilinishicha, mamlakat oltin zaxirasi 907 million dollarga oshib, 24 milliard 632,2 million dollarni tashkil etmoqda. Qimmatbaho metallning hajmi ham 0,3 million troy unsiyaga (9,3 tonna) oshib, 11,9 million troy unsiyasini (taxminan 379,13 tonna) tashkil etdi.
Zaxiralar ketma-ket oltinchi oy davomida kamaygan edi — 2023-yil mayda rasmiy zaxira aktivlari 837,9 million dollarga, iyunda — 649 million dollar, iyulda —71,8 million dollar, avgustda — 958 million dollar, sentyabrda esa 1 milliard 650 million dollarga kamaygandi. Oktyabr oyida bo‘lsa oltin-valyuta zaxiralari aprel oyidan buyon ilk bor oshgan edi. Noyabr oyida esa O‘zbekistonning rasmiy zaxira aktivlari noyabr oyida 8 million dollarga kamayib, 2023-yil 1-dekabr holatiga ko‘ra, 32 milliard 896,5 million dollarni tashkil etgandi.
Oltin zaxiralari nima uchun kerak?
Oddiy til bilan aytganda, bu sug‘urta, davlatning “xavfsizlik yostig‘i”. Zaxiralar dunyoning deyarli barcha mamlakatlarida favqulodda vaziyatlar uchun mavjud.
Zaxiralar odatda yuqori likvidli, ya’ni tez sotiladigan aktivlarda saqlanadi. Oltin va xorijiy valyuta ushbu talablarga javob beradi — ulardan istalgan vaqtda qarz to‘lash yoki investitsiyalar uchun foydalanish mumkin.
2017-yilgacha O‘zbekiston zaxiralari to‘g‘risidagi ma’lumotlar jamoatchilikka e’lon qilinmas edi. O‘sha yilning noyabr oyida zaxiralar 26 milliardni tashkil etishi ma’lum bo‘lgan.
