Samarqandda masjid o‘rniga bog‘cha qurgan ayol 40 nafar yetim bolaga bepul taʼlim-tarbiya bermoqda
Samarqand viloyatida masjid o‘rniga bog‘cha qurgan ayol bugungi kunda 40 nafar yetim bolaga bepul taʼlim-tarbiya bermoqda. Bu haqda Maktabgacha taʼlim agentligi xabar berdi.
Maʼlum qilinishicha, 2019-yilda Samarqand viloyatida quvvati 250 o‘rinli maktabgacha taʼlim tashkiloti davlat-xususiy sherikchilik asosida faoliyat boshladi. Bugungi kunda bog‘chaga 200 nafardan ortiq bola qamrab olingan. Ulardan 40 nafari yetim bolalar bo‘lib, ular bepul taʼlim-tarbiya olmoqda. 32 nafar yordamga muhtoj oilalarning farzandlari imtiyozli 150 ming so‘mlik to‘lov va qolgan tarbiyalanuvchilar esa ota-onalar badali orqali taʼlim-tarbiya olmoqda.
Davlat-xususiy sherikchilik asosida faoliyat olib borayotgan bog‘cha loyihasi 11 milliard so‘m bo‘lib, 3 milliard so‘mi davlat tomonidan kredit, qolgan 8 milliard so‘mi tadbirkor mablag‘i evaziga ish boshlagan. Xususiy bog‘cha mudirasi Dilfuza Maʼrufova bog‘cha qurilib, ishga tushishidan oldin yetim bolalarni bepul tarbiya qilishni maqsad qilgan.
“Turmush o‘rtog‘im masjid qurishni maqsad qilgan paytlarida yon-atrofimizdagilar bog‘cha ham masjiddek joy, shuning uchun bolalar bog‘chasi quringlar, deya maslahat bergan. Maslahatlardan kuch olib, ushbu bog‘cha faoliyatini yo‘lga qo‘yganmiz. Har bir bolani oilaviy sharoiti bilan yaqindan tanishgan holda bog‘chaga qabul qilaman. Bugungi kunda muassasasada ingliz tili, shaxmat-shashka, karate, gimnastika, mental arifmetika, xoreografiya to‘garaklari ish olib bormoqda”, — deydi Dilfuza Maʼrufova.
Dilfuza Maʼrufova 20 yil davomida Samarqanddagi maktablardan birida oliy toifali pedagog sifatida faoliyat yuritgan.
