Zinedin Zidan “Bavariya” variantini ko‘rib chiqadi
Tomas Tuxel mavsum oxirida “Bavariya”ni tark etishi ma’lum bo‘lgach, uning o‘rniga kelishi mumkin bo‘lgan murabbiylar haqida turli xabarlar paydo bo‘lmoqda. Masalan, Myunxen klubi Zidanni bosh murabbiylik uchun davogarlardan biri sifatida ko‘rayotgani ma’lum bo‘ldi.
Sport1 ning Zidan atrofidagi kishilarning fikriga tayanib xabar berishicha, fransiyalik mutaxassis “Bavariya”ni boshqarish taklifi bo‘lsa rad etmasligini aytib o‘tgan. Fransiyalik sobiq futbolchining fikricha, klubning “Real” bilan umumiy jihatlari ko‘p, xususan, ikki klub ham boy tarix va qulay sharoitlarga ega. Zidan murabbiylik faoliyatini davom ettirish uchun “Yuventus” va Fransiya terma jamoasi qatoriga “Bavariya” variantini ham kiritgan.
Shuningdek, Zidanning har bir chiziqqa tizimli yondashishi va kichik detallargacha e’tibor qaratishi nemis futboliga mos kelishi ta’kidlangan. Ammo agar “Bavariya” fransiyalik murabbiyni taklif qilmoqchi bo‘lsa, rahbariyat unga qarorlar qabul qilish vakolatini berishi va murabbiyning so‘rovlarini bajarishi kerak.
