Shmigal: “Ukraina joriy yilda 37 milliard dollar miqdorida yordamga muhtoj”
Ukraina 2024-yilda kamida 37 milliard dollar moliyaviy yordamga muhtoj. Bu haqda Ukraina bosh vaziri Denis Shmigal matbuot anjumani chog‘ida ma’lum qildi.
“Oxirgi ikki yilda biz xorijdan 75 milliard dollardan ortiq yordam oldik. Aslida, biz mudofaa xavfsizligi ehtiyojlari uchun faqat ichki resurslarni sarflaymiz”, — dedi u.
Uning so‘zlariga ko‘ra, to‘g‘ridan to‘g‘ri byudjetni qo‘llab-quvvatlashning asosiy donorlari Yevropa Ittifoqi, AQSH, XVF, Yaponiya, Kanada, shuningdek, G7 ning boshqa davlatlari hisoblanadi.
“Biz 2022-yilda taxminan 37 milliard dollar yig‘dik. 2023-yilda 42 milliard dollardan ko‘proq mablag‘ to‘pladik. Bu yilgi reja hamkorlarimizdan kamida 37 milliard dollarlik yordamni jalb qilishdir”, — dedi Shmigal.
Uning qo‘shimcha qilishicha, bu yil Ukraina byudjeti taqchilligi Ukraina yalpi ichki mahsulotining 20 foizidan ortig‘ini tashkil etadi — 37 milliard dollar.
Hozirda Ukraina Yevropa Ittifoqidan 17,3 milliard dollar yordam kutmoqda.
