Isroil Madrimov ESPN reytingida top-3 likdan joy oldi 

Amerikaning ESPN portali boks bo‘yicha o‘z reytingini yangiladi.

Unga ko‘ra, o‘zbekistonlik bokschi Isroil Madrimov (10-0-1, 7KO) birinchi o‘rta vazn toifasi reytingida 3-o‘ringa ko‘tarildi. Bokschi bundan avval reytingda 8-pog‘onada borayotgan edi.

Madrimov 8-mart kuni Saudiya Arabistonining Ar-Riyod shahrida o‘tkazilgan prof boks oqshomida rossiyalik Magomed Kurbanovni 5-raundda texnik nokautga uchratib, vakant bo‘lib turgan WBA chempionlik kamarini qo‘lga kiritgan edi. Qayd etib o‘tish joiz, Kurbanov faoliyatida ilk bor mag‘lubiyatga uchradi.

Yangilangan reytingda Isroildan oldingi o‘rinlarni ushbu vaznda sobiq mutlaq jahon chempioni Jermell Charlo (35-2-1, 19KO) hamda WBO kamari sohibi Tim Szyu (24-0, 17KO) band etgan.