Jinsiy zo‘ravonlikda ayblanib, qamalgan Dani Alves garov evaziga ozodlikka chiqadi
“Barselona” sobiq himoyachisi Dani Alves yakuniy hukm chiqquniga qadar garov evaziga ozodlikka chiqadi.
Avvalroq, Alves jinsiy zo‘ravonlikda ayblanib, 4,5 yillik qamoq jazosiga hukm qilingandi. Shuningdek, futbolchi jabrlanuvchiga 150 ming yevro to‘lashi va 9,5 yil davomida unga yaqin yo‘lamasligi belgilangan.
Futbolchi tomoni appelyatsiya bergan. Shundan so‘ng, Alves hukm kuchga kirguniga qadar qamoqdan ozod etilishini so‘ragan: “Men qochib ketmayman, adolatga ishonaman”.
Marca nashrining xabariga ko‘ra, Barselona sudi sobiq futbolchini ozodlikka chiqishiga ruxsat bergan. Buning uchun Dani garov evaziga bir million yevro to‘lashi kerak bo‘ladi.
Dani Alves 2008-yildan 2016-yilga qadar, 2021-yildan 2022-yilgacha “Barselona” sharafini himoya qilgan. Himoyachi kataloniyaliklar safida 408 ta o‘yin o‘tkazib, 23 ta sovrin qo‘lga kiritgan.
