Buxoroda voyaga yetmagan farzandlari uchun aliment to‘lamay kelgan ona o‘z nomidagi uyni o‘g‘illaridan birining nomiga rasmiylashtirib berdi. Bu haqda “Daryo”ga MIB Buxoro viloyat boshqarmasi axborot xizmati ma’lum qildi.
Majburiy ijro byurosi Qorovulbozor tumani bo‘limi qarzdor B.A. dan undiruvchi S.N. foydasiga ish yurituvida fuqarolik ishlari bo‘yicha Kogon tumanlararo sudining 2010-yil 25-iyuldagi ikki nafar voyaga yetmagan farzandining moddiy ta’minoti uchun oylik ish haqi va barcha turdagi daromadlarining 1/3 qismi miqdorida aliment undirish to‘g‘risidagi ijro hujjati mavjud.
Qarzdor aliment majburiyatlarini to‘lashdan bo‘yin tovlab kelganligi sababli jinoyat ishlari bo‘yicha Qorovulbozor tuman sudining 2016-yil 15-iyul hukmiga asosan aybdor deb topilgan va unga tegishli jazo tayinlangan.
Majburiy ijro harakatlari qarzdor B.A.ga aliment to‘lash tartibi bo‘yicha huquq va majburiyatlari tushuntirilgan hamda javobgarlik qo‘llanilishi mumkinligi to‘g‘risida ogohlantirilgan.
“Qarzdor B.A. bundan o‘ziga tegishli xulosa chiqarib, aliment ijro hujjatiga asosan hisoblangan 71 million 247 ming so‘mlik aliment to‘lovlaridan qarzdorligi uchun o‘g‘li R.Sh. nomiga Qorovulbozor tumani “Tinchlik” MFY Alisher Navoiy ko‘chasidagi xonadonni notarius ishtirokida rasmiylashtirib berdi”, — deyiladi xabar.
Ijro hujjati “Sud hujjatlari va boshqa organlar hujjatlari to‘g‘risida”gi qonunning 41-moddasiga asosan amalda tamomlangan.
Avval MIB Toshkent shahrida 126 million so‘mlik hamda 110 million so‘mlik, Farg‘onada karantin sharoitida 38 million so‘mlik va Namanganda 40 million so‘mlik aliment pullarini undirib bergani, Andijonda 2 nafar bolani ota qaramog‘idan ona tarbiyasiga olib bergani to‘g‘risida xabarlar berilgan edi.
Izoh (0)