Curiosity marsoxodi “Qizil sayyora”ning yorqin nur sochayotgan kumushrang va sadafsimon bulutlari tasvirlangan suratlar bilan bo‘lishdi, deb xabar beradi Hi-Tech.Mail.ru.
NASA ma’lumotlariga ko‘ra, Marsning yupqa atmosferasida bulutlar juda kamdan kam hollarda shakllanadi. Odatda bu ekvatorda, yilning eng sovuq vaqtida sodir bo‘ladi.
“Muz kristallarga to‘la yupqa qatlamlar Quyoshdan tushayotgan nurni o‘ziga yutmoqda. Ularning ayrimlari miltillab, turli ranglarda tovlanyapti”, — deya izohlaydi mutaxassislar.
Suratlar ajoyib ko‘rinishiga ega bo‘libgina qolmay, NASA jamoasiga Marsni tadqiq etishda yangi ma’lumotlarni ham taqdim etadi. Bulutlar qanday balandlikda shakllanishidan kelib chiqib, olimlar uning tarkibini aniqlaydi. Ayrim bulutlar suv muzidan iborat bo‘lsa, ba’zilari muzlagan karbonat angidrid yoki quruq muzdan tarkib topgan.
Curiosity suratlarning ham oq-qora, ham rangli variantlarini taqdim etgan. Ularning birida butlarning to‘lqinsimon shaklini ko‘rish mumkin.
Quyosh botishi bilan kuzatilayotgan mazkur bulutlarning muz kristallari so‘nayotgan nurni akslantirib, ularni qorong‘i osmonni yoritishga majbur etmoqda. “Kumushsimon” yoki “tunda nur sochuvchi” nomi bilan ma’lum bulutlar kristallar bilan to‘lib, keyin Quyosh o‘z holatini pastga o‘zgartirganda yanada yorqinlashadi. Ushbu yorqinlik orqali olimlar bulutlarning qanday balandlikda joylashganini aniqlaydi.
Boulder kosmik ilm-fan instituti olimi Mark Lemmon bulutlardagi qizil, yashil, ko‘k va alvon ranglardan hayratga tushgan. “Marsda nur taratayotgan ko‘plab ranglarni ko‘rish — bu haqiqatan ajoyib”, — deydi u.
Avvalroq NASA’ning Mars Reconnaissance Orbiter zondi orbitadan turib Mars yuzasini yana bir bor suratga olgandi.
Izoh (0)