Xitoy 2022-yilgi ilk orbital uchirish doirasida “Shiyan-13” eksperimental sun’iy yo‘ldoshini Yer orbitasiga muvaffaqiyatli olib chiqdi. Bu haqda Xitoy aerokosmik fan va texnologiya korporatsiyasi (CASC)ga tayanib, “Interfaks” xabar berdi.
“17-yanvar kuni Pekin vaqti bilan soat 10:35 da (Toshkent vaqti bilan 07:35) Tayyuan kosmodromidan uchirilgan “Chanchjen-2D” raketa-tashuvchisi yordamida “Shiyan-13” kosmik apparati mo‘ljallangan orbitaga chiqarildi. Missiya to‘liq muvaffaqiyatli o‘tdi, deb tan olindi ”, — deyiladi korporatsiya bayonotida.
CASC ma’lumotlariga ko‘ra, “Shiyan-13” koinotni kuzatish va tegishli texnologiyalarni sinab ko‘rish uchun mo‘ljallangan.
Ikki bosqichli “Chanchjen-2D” raketa-tashuvchisi Shanxay kosmik texnologiyalar akademiyasi (SAST) tomonidan sun’iy yo‘ldoshlarni Yerning quyi orbitasiga chiqarish uchun ishlab chiqilgan. Ishlab chiquvchilarning ma’lumotlariga ko‘ra, shuningdek, u 1300 kilogrammgacha foydali yukni taxminan 645 kilometr balandlikdagi quyosh-sinxron orbitaga olib chiqishga qodir.
Avvalroq amerikalik tadbirkor Ilon Maskning SpaceX kompaniyasi o‘zining tijoriy dasturi doirasida xususiy va davlat sun’iy yo‘ldoshlariga ega raketasini uchirgani, ular orasida Ukrainaning “Sich-2-30” apparati ham mavjudligi haqida xabar berilgandi. Ukraina oxirgi marta orbitaga o‘zining sun’iy yo‘ldoshini 2011-yilda uchirgan edi.
Eslatib o‘tamiz, dekabr oyida Xitoy Maskning Starlink sun’iy yo‘ldoshlari ustidan Birlashgan Millatlar Tashkilotiga shikoyat qilgan. Pekin bayonotiga ko‘ra, Starlink sun’iy yo‘ldoshlari Xitoy kosmik stansiyasi bilan kamida ikki marta “to‘qnashib ketay degan”.
Izoh (0)