Prezident qarori bilan ipakchilik va qorako‘lchilik sohasiga taqdim etilgan ayrim soliq imtiyozlari muddatlarini uzaytirish belgilandi. Bu haqda Davlat soliq qo‘mitasi xabar qildi.
Qayd etilishicha, ipak qurti urug‘i, tut ko‘chatlari va pilla yetishtirish, pillani qayta ishlash va tayyor mahsulotlar ishlab chiqarish bilan shug‘ullanuvchi yuridik shaxslarni mol-mulk va yer solig‘idan ozod etish imtiyozi 2023-yildan 2026-yilga qadar uzaytiriladi. Shuningdek, qorako‘lchilik mahsulotlari ishlab chiqaruvchilari uchun yer solig‘i stavkasini 2018-yilda belgilangan miqdorda saqlab qolish muddati 2026-yilgacha uzaytiriladi.
Qarorda mazkur o‘zgarishlardan kelib chiqib Soliq kodeksiga kiritiladigan o‘zgartirish va qo‘shimchalar bo‘yicha qonun loyihasi Vazirlar Mahkamasi tomonidan Oliy Majlis Qonunchilik palatasiga kiritish belgilangan.
Avvalroq O‘zbekistonda birinchi chorakda banklar tomonidan qariyb 700 mlrd so‘mlik soliq to‘langani, mahalliy tadbirkorlarning mahsulotlari uchun birja to‘lovlari 2 baravarga qisqartirilishi, soliq huquqbuzarliklari haqida xabar berganlik uchun pul to‘lash tartibi belgilangani haqida xabar berilgan.
Izoh (0)