Apple kompaniyasi Xiaomi’dan o‘g‘irlaganlikda ayblanmoqda. iOS 16 tizimi MIUI’ga o‘xshab ketadi

Apple kompaniyasi dasturchilar uchun mo‘ljallangan WWDC 2022 konferensiyasida iOS 16 ni taqdim etdi. Yangilangan operatsion tizimning o‘ziga xosligi — moslashtirish opsiyalari yordamida ekranni yangicha bloklash imkoniyati, deb xabar beradi Hi-Tech.Mail.ru.

Yangi versiyada “oboy”lar galereyasi paydo bo‘lgan bo‘lib, unda ob-havo ma’lumoti, smayliklar tasvirlangan. iOS 16 ga, shuningdek, Yer va Oy tasvirlari qo‘shilgan, smartfon blokdan chiqarilsa, ular kattalashadi.

Bu kabi “zastavka”lar ijtimoiy tarmoqlarda keng muhokamalarga sabab bo‘ldi, chunki foydalanuvchilar Apple ushbu yangilikni Xiaomi’dan o‘g‘irlagan deb hisoblayapti. MIUI operatsion tizimida “superoboylar” 2020-yilda paydo bo‘lgan.

Shu bilan birga, foydalanuvchilarning ma’lum qilishicha, Xiaomi apparatlaridagi “superoboylar” ancha yaxshi ishlangan. Bu ham animatsiyaning o‘ziga, ham kontent sifatiga taalluqli. MIUI 12 dan boshlab blokdan chiqarilsa, sayyora shu qadar yaqinlashadiki, undagi tog‘lar va boshqa peyzajlarni ko‘rish mumkin.

Apple bundan oldin ham Xiaomi’ning yechimlaridan foydalangan. Jumladan, Apple’ning 2021-yilgi konferensiyaga taklifnoma-posteri 2017-yilda taqdim etilgan Xiaomi Mi Mix 2s smartfoni posteriga juda o‘xshab ketgandi.

Hozircha kompaniya mazkur vaziyatga hech qanday izoh bermagan.