Dunyodagi ikkinchi eng qimmat kriptovalyuta efirium dasturiy ta’minotida keng ko‘lamli yangilashni yakunladi. Bu haqda CNN xabar bermoqda.
Ma’lumotlarga ko‘ra, The Merge nomi bilan mashhur bo‘lgan uzoq kutilgan yangilanish kriptovalyutaning energiya sarfini qariyb 99,95 foizga kamaytiradi.
The Merge asl Ethereum Mainnet’ning Beacon Chain deb nomlangan alohida blokcheyn bilan birlashishini nazarda tutadi, — deya qo‘shimcha qilinadi xabarda.
Shu paytgacha efirium ham, bitkoin ham “proof-of-work” deb nomlangan mexanizmda ishlayotgan bo‘lib, unda yuqori quvvatli kompyuterlar talab qilingan.
Yangilanish efiriumni “proof-of-stake” deb nomlangan mexanizmga o‘tkazadi, bu esa ancha tejamkorroq, chunki u kompyuterlarni bir-biri bilan raqobatlashish zaruratini yo‘q qiladi.
Buning o‘rniga foydalanuvchilar ko‘proq valyuta uchun poygada ishtirok etishda o‘z efirlarini depozit qiladi.
Deutsche Bank tadqiqoti tahlilchisi Marion Labour bu hafta o‘z eslatmasida ushbu yangilanish bilan efirium xavfsizlikni yaxshilashga, energiya sarfini kamaytirishga, tarmoqdagi foydalanuvchilar sonini oshirishga umid qilmoqda.
Ta’kidlanishicha, yangilanish butun dunyo bo‘ylab elektr energiyasi iste’molini 0,2 foizga qisqartiradi.
So‘nggi bir necha yil ichida kriptovalyutalar yuqori o‘sish ko‘rsatgan bo‘lsa-da, kuzatuvchilarning ta’kidlashicha, ular atrof-muhit uchun zararli.
Kriptoning energiyadan foydalanishini kuzatuvchi Digiconomist platformasiga ko‘ra, bitta efirium tranzaksiyasi AQSHdagi o‘rtacha uy xo‘jaligining haftalik quvvat iste’moliga teng.
Shu oy boshida Digiconomist yangilanish natijasida tejalgan quvvat Portugaliya kabi mamlakatning elektr energiyasi iste’moliga teng bo‘lishini aytdi.
Yangilikdan so‘ng efirium 0,7 foizga pasayib, 1592,78 dollarni tashkil etdi, ammo tahlilchilarning ta’kidlashicha, bu uzoq muddat kripto olamiga katta ta’sir ko‘rsatishi mumkin.
CoinDesk ma’lumotlariga ko‘ra, dunyodagi eng qimmat kriptovalyuta bitkoin deyarli 1 foizga pasayib, 20 174 dollardan sotilgan.
Izoh (0)