Zamonaviy me’morchilik — alohida san’at turidir. Kimgadir qayta tiklangan shisha-beton binolar yoqadi, kimdir shaharlarning tarixiy ko‘rinishini buzmoqda deb hisoblaydi, boshqalar esa bunday noodatiy inshootlarga ko‘nikish kerakligiga amin, chunki vaqt o‘tishi bilan ular ham klassikaga aylanadi.
Mumbaydagi Cyberegg binosi
Jeyms Law Cybertecture International dizayn studiyasi xodimlari o‘z ijod namunalarini ultra zamonaviy tuxum-bino sifatida tavsiflaydilar. Loyiha Mumbayda (Hindiston) amalga oshirilishi rejalashtirilgan. Qurilish keng ko‘lamli bo‘ladi, chunki tuxum shaklidagi strukturaning maydoni 32 000 kvadrat metrni tashkil qiladi. Bino perimetri bo‘ylab quyosh batareyalari va shamol tegirmonlari o‘rnatiladi, shunda ko‘p qavatli noodatiy bino o‘z-o‘zini elektr energiyasi bilan ta’minlaydi.
Arxitektorlarning so‘zlariga ko‘ra, binoga tashrif buyuruvchilarga bino ekotizimlari bilan o‘zaro munosabatda bo‘lish imkonini beruvchi kompyuter texnologiyalari o‘rnatiladi. Xususan, unga “Cybertecture sog‘liqni saqlash tizimi” joriy etiladi, uning yordamida odamlar o‘z sog‘lig‘i haqidagi ma’lumotlarni nazorat qilish, solishtirish va xulosa qilish imkoniyatiga ega bo‘ladi. Misol uchun, “kiber tuxum” ichiga kirgan har qanday odam qon bosimini o‘lchashi mumkin.
Bundan tashqari, issiqxona effektining oldini olish uchun binoda bog‘ barpo qilinadi, ular filtrlangan suv bilan sug‘oriladi. Hindistonda bunday ofis binosiga qancha ehtiyoj borligi hozircha aniq emas. Ammo buning uchun allaqachon mablag‘ ajratilgan. Bir necha yil ichida Mumbayda qadimiy binolar orasida va xarobalar fonida shisha “kiber tuxum” qad rostlaydi.
Chanchjoudagi Lotus (nilufargul) shaklidagi bino
Mazkur bino Xitoyning Changzhou shahrini bezab turadi. Lotus binosi sayyohlar tashrif buyuradigan va mahalliy aholi faxrlanadigan asosiy diqqatga sazovor joylardan biridir. Bino haqiqatan ham juda fotogenik. Joylashuvi o‘zining tashqi ko‘rinishi va nomiga romantizm qo‘shadi – bino 3,5 gektar bog‘ bilan o‘ralgan sun’iy ko‘lning markazida joylashgan. Lotus ichida asosan ofis maydoni va biznes uchun yig‘ilish xonalari mavjud. Oddiy tashrif buyuruvchilar uchun bepul muzey vazifasini bajaradi.
Bunday noodatiy konstruksiyani Avstraliyaning Studio 505 byurosi mutaxassislari yaratishgan. O‘z loyihasining mustahkamligini ta’kidlab, bino 2,5 ming geotermal qoziq bilan ta’minlangani, shu bois u qulab tushmasligi va uzoq yillar davomida turishini aytishdi.
Kaunasdagi banknot ko‘rinishidagi inshoot
Kaunas — Litvadagi shahar bo‘lib, u haqida ko‘pchilik 2008-yilda banknot-bino qurilganidan keyin biladi. Uning ochilishi mamlakat uchun muhim voqea – Yevropa Ittifoqiga qo‘shilish bilan bir vaqtga to‘g‘ri keladi. Binoning tashqi ko‘rinishi uning maqsadini oqlaydi — unda bir vaqtning o‘zida ikkita yirik Litva banki joylashgan.
Nominal qiymati 1000 lit bo‘lgan 1926-yil banknotining dizayni 4000 dona shisha panellarda aks ettirilgan, usti maxsus emal bo‘yoq bilan qoplangan. G‘oya va uni amalga oshirish uchun mas’ul me’mor — Rimas Adomaitis va uning jamoasi RA Studio. E’tiborlisi, banknot-bino shahar markazida emas. Kaunasning eski binolari bilan kontrast yaratmaslik uchun uni ataylab chetroqqa qurishgan.
Huaynandagi pianino-bino
Yana bir ajoyib bino Xitoyda joylashgan. Pianino yonida shaffof violonchel ko‘rinishidagi kichikroq inshoot Huaynan shahrida qurilgan. Bino shunchaki musiqa asboblariga o‘xshab qurilgan emas — ularni aynan takrorlaydi. Ushbu me’moriy durdona mualliflari — Huainan Fangkai Decoration Project Co kompaniyasi xodimlari va Xefey texnologiya universiteti talabalari. Ko‘pincha pianino uyi ko‘rgazmalar va ommaviy tadbirlar uchun foydalaniladi.
Nyuarkdagi savat-bino
AQSHning Ogayo shtati, Nyuark shahrida sayyohlar uchun zamonaviy arxitektura markazi bo‘lib, to‘qilgan savat ko‘rinishidagi uy bor. G‘ayrioddiy ko‘rinishga ega yetti qavatli binoda savat va to‘qilgan buyumlar sotuvchi Longaberger basket company kompaniyasining bosh qarorgohi joylashgan. Bino NBBJ va Korda/Nemeth Engineering tomonidan loyihalashtirilgan. Ish ko‘p vaqtni olgan, lekin uni amalga oshirish uchun undan ham ko‘proq mablag‘ sarflanadi. Shu sababli tashkilot direktori kompaniyaning boshqa shaharlardagi bo‘linmalarini xuddi shu uslubda bezash g‘oyasidan voz kechadi.
Mavzuga doir:
Izoh (0)