Amerikaliklarning atigi 10 foizi Amerika banklari va boshqa moliya institutlariga “yuqori darajadagi ishonch”ga ega. Bu respondentlarning 22 foizi banklarga yuqori ishonch bildirgan 2020-yilga nisbatan ancha past.
Bunday ma’lumotlar Associated Press va Chikago universitetining Jamoatchilik tadqiqotlari markazi (NORC) hamkorligida o‘tkazilgan ijtimoiy so‘rovda keltirilgan.
So‘rov natijalariga ko‘ra, amerikalik katta yoshli odamlarning 57 foizi mamlakat banklariga “bir oz” ishonadi, respondentlarning 31 foizi esa ularga “ishonmaydi”.
So‘rov 16—20-mart kunlari o‘tkazildi va unda 1080 dan ortiq amerikalik ishtirok etdi. So‘rov mualliflarining qayd etishicha, natijalarga bir necha banklarning qulashi bilan bog‘liq vaziyat ta’sir qilgan.
10-mart kuni e’lon qilingan Kaliforniyadagi Silikon vodiysi bankining (SVB) qulashi 2008-yildan beri AQSHdagi eng yirik bank inqirozi bo‘ldi.
SVBdan keyin Nyu-Yorkda joylashgan Signature Bank ham bankrot bo‘lib, AQSH tarixidagi uchinchi yirik bank inqiroziga aylandi.
Amerikaliklar bunday vaziyatning sabablaridan biri AQSH hukumati bank sohasini tartibga solish uchun qo‘lidan kelgan barcha ishni qilmayotganida, deb hisoblamoqda.
Respondentlarning 56 foizi hukumat banklar va moliya institutlarini tartibga solish bo‘yicha yetarli chora ko‘rmayotganini, 27 foizi tartibga solish yetarli, 15 foizi esa bu sohani tartibga solish ortiqcha, deb hisoblagan.
Shu bilan birga, amerikaliklarning qariyb 50 foizi shaxsiy moliyaviy ahvoli yaxshi ekanini ko‘rsatmoqda, biroq respondentlarning bir xil qismi kelgusi yilda Qo‘shma Shtatlardagi iqtisodiy vaziyat yomonlashishiga ishonch bildirgan.
Izoh (0)