Qozog‘iston Favqulodda vaziyatlar vazirligi rahbari Yuriy Ilin Turkiyadagi vaziyat Qozog‘istonni seysmik xavfsizlik masalalariga alohida e’tibor qaratishga undaganini ta’kidladi, deb xabar bermoqda “Daryo”ning respublikadagi muxbiri vazirlik matbuot xizmatiga tayanib.
Ilinning so‘zlariga ko‘ra, Qozog‘iston hududining 40 foizdan ortig‘i ushbu tabiiy ofatni boshdan kechirgan. FVV tizimiga o‘tkazilgan Seysmologiya instituti ko‘p yillar davomida deyarli moliyalashtirilmagan. 2023-yilda esa ushbu institut joylashgan Olmaotada zilzila xavfini batafsil tahlil qiladigan 30 dan ortiq stansiyalar o‘rnatiladi. Stansiyalar joriy yil oxirigacha Qozog‘iston prezidenti topshirig‘iga binoan mahalliy budjet hisobidan foydalanishga topshiriladi.
Shu bilan birga, vazir bunday ishlarni barcha zilzila ehtimoli bor hududlarda olib borish kerak, deb hisoblaydi. Ekspert ogohlantirish tizimi qanday ishlashini ham tushuntirib berdi.
“Biz zilzilalar sodir bo‘lishi mumkin bo‘lgan taxminiy epimarkaz nuqtalarini bilamiz, sensorlar zilzila uchun zaruriy sharoit yuzaga kelayotgani yoki yo‘qligini aniqlash uchun markazlarga joylashtiriladi. Xavf aniqlangan taqdirda, ular aholini ogohlantirish uchun avtomatik ravishda shahar va aholi punktlarining ogohlantirish tizimiga signal uzatishi kerak. Zilzila o‘chog‘idan aholi punktlariga seysmik to‘lqin yetib boradigan o‘nlab soniyalarda ham bir necha kishining hayoti saqlab qolinishi mumkin”, — deb hisoblaydi FVV rahbari.
Shuningdek, u Qozog‘istonda seysmik hududlarda loyiha va qurilish me’yorlari mustahkamlanganini qo‘shimcha qildi.
“Ularga rioya qilish loyiha tashkilotlari, ishlab chiquvchilarning burchidir va qurilish sifati ko‘p jihatdan ularga bog‘liq. Hatto yirik shaharlarda ham, jumladan, g‘ishtdan qurilgan va foydalanishga topshirilgan turar joy binolari ko‘p hollarda hech qanday standartlarga javob bermaydi va halokatli zilzilalarga dosh berolmaydi. Bu yerda ish ko‘lami keng, ishlab chiquvchilarga qo‘yiladigan talablarni kuchaytirish uchun katta moliyaviy resurslar va qonunchilikni qayta ko‘rib chiqish talab etiladi”, — deya xulosa qildi Yuriy Ilin.
Svetlana Shesternyova, Olmaota
Izoh (0)