O‘zbekistonning “Ohangaronsement” zavodi AQSHning sanksiyalariga uchradi. Bu haqda mamlakat Moliya vazirligi xabar berdi.
Ma’lumotlarga ko‘ra, Alisher Usmonovning USM xoldingi tomonidan tashkil etilgan Akkermann Cement CA ham cheklovlar ostida qoldi.
2021-yil may oyida Kiprda ro‘yxatdan o‘tgan Lamanka Enterprises kompaniyasi “Ohangaronsement” aksiyalarining 84,2 foizini 557,6 milliard so‘mga sotib olgan.
2022-yil yanvar oyida Britaniya Virjiniya orollarining Lamanka Enterprises va Giacinttar kompaniyalari o‘z aksiyalarini 1,88 trillion so‘mga sotgani e’lon qilingandi.
Keyinchalik aksiyalarning xaridori Alisher Usmonovning USM xoldingi tomonidan yaratilgan Akkermann Cement CA ekanligi ma’lum bo‘ldi.
AQSH Moliya vazirligining ta’kidlashicha, Usmonovning offshor bizneslarining keng tarmog‘i bor va u o‘z oila a’zolaridan moliyaviy operatsiyalar uchun ham foydalanishi mumkin. Bu esa unga sanksiyalarni chetlab o‘tish imkonini beradi.
AQSHning Chet el aktivlarini nazorat qilish boshqarmasi yangi sanksiya ro‘yxatidagi ayrim kompaniyalar, jumladan Akkermann Cement CA bilan operatsiyalarni 11-iyulga qadar bekor qilish uchun litsenziya berdi.
Bundan tashqari, Alisher Usmonov xoldingiga kiruvchi “Metalloinvest”, “USM Telecom” va “Megafon” ham sanksiyalar ostida qoldi.
Cheklovlar, shuningdek, “Metalloinvest” tarkibiga kiruvchi kompaniyalarga ham kiritildi: Mixaylovskiy kon-qayta ishlash kombinati, Lebedinskiy GOK va OEMK.
USM xolding izohi
USMning sanksiyalar bo‘yicha vakili xoldingga nisbatan sanksiyalar qo‘llangani haqida “Daryo”ga izoh berdi.
Biz AQSH tomonidan USM xoldingi, uning sho’ba korxonalari, ularning rahbariyati, shuningdek, Alisher Usmonov va boshqa aksiyadorlarning qarindoshlariga nisbatan joriy etilgan cheklovlarni adolatsiz va asossiz deb hisoblaymiz, — deya ta’kidladi kompaniya.
Xabarda aytilishicha, Alisher Usmonov uzoq vaqtdan beri tadbirkorlik faoliyati bilan shug‘ullanmagan, xoldingning 50 foizdan kam qismiga egalik qiladi va uni boshqarishda ishtirok etmaydi.
Alohida ta’kidlab o‘tamizki, ro‘yxatlarga qarindoshlarning kiritilishi axloqsiz amaliyot, garovga olishni eslatadi. Ushbu cheklovlar noqonuniy deb e’tiroz bildiriladi, — deyiladi sharhda.
“Ohangaronsement” zavodi haqida
“Ohangaronsement” zavodi 20-asr o‘rtalarida tashkil etilgan bo‘lib, 1970-yilda zavod, 1980-yilda ishlab chiqarish birlashmasiga aylangan. 1994-yilda xususiylashtirilib, aksiyadorlik jamiyatiga aylantirilgan.
Uzoq vaqt davomida korxonaning asosiy egasi Zeromax bo‘lgan. 2006-yilda Rossiyaning “Yevrosement” kompaniyasi undan 75,5 foiz ulushni sotib oldi. Keyinchalik bu ulush 83,9 foizga yetkazildi.
Izoh (0)