Turkmaniston mudofaa vaziri Begench Gundogdiyev Davlat xavfsizlik kengashi yig‘ilishida harbiy-taktik o‘quv mashg‘ulotlariga tayyorgarlik haqida maʼlumot berdi. Bu haqda mahalliy “Oltin Asyr” telekanali xabar bermoqda.
Turkmaniston prezidenti Serdar Berdimuhamedov, ayni paytda mamlakat Qurolli kuchlari Oliy qo‘mondoni Turkmaniston faqat mudofaaviy harbiy doktrinaga sodiqligini aytdi.
“Bo‘lajak mashg‘ulotlarga puxta tayyorgarlik ko‘rish kerak. Shu bilan birga, birinchi navbatda, harbiy sohadagi ilg‘or jahon tajribasini yanada o‘rganish va amaliyotga joriy etishga e’tibor qaratish lozim”, — dedi u.
Ashxobod muntazam ravishda, jumladan, Kaspiy dengizida ko‘rgazmali taktik mashg‘ulotlar o‘tkazib turadi. Qurolli kuchlarning barcha bo‘linmalari: quruqlikdagi qo‘shinlar, havo kuchlari, havo hujumidan mudofaa va dengiz floti ishtirok etgan avvalgi harbiy ko‘rgazma oktabr oyida bo‘lib o‘tgan.
1995-yildan beri Turkmaniston ijobiy betaraflik maqomiga ega va harbiy-siyosiy bloklarning birortasiga ham kirmaydi. Turkmaniston armiyasi Markaziy Osiyoning beshta davlati ichida O‘zbekiston va Qozog‘istondan keyin Global Firepower 2023 hisobotiga asosan qudrati bo‘yicha uchinchi o‘rinda turadi.
Turkmaniston Afg‘oniston (800 km), Eron (1.148 km), Qozog‘iston (458 km) va O‘zbekiston (1.650 km) bilan quruqlikda chegaradosh. Kaspiy dengizida mamlakat Ozarbayjon, Eron, Qozog‘iston va Rossiya bilan chegaradosh. Turkmanistonning dengiz chegarasining umumiy uzunligi 600 kilometrga yaqin.
Izoh (0)