Afg‘onistonning O‘zbekiston bilan chegaradosh Balx viloyati markazi Mozori Sharif shahridagi meva va shirinliklar bozori Ramazon hayiti arafasida har doimgidan gavjumlashdi. “Daryo”ning Afg‘onistondagi muxbiri tushuntirishicha, u yerda Ramazon hayiti “quruq meva bayrami” ham deb ataladi, chunki bu bayramda quruq mevalar sotuvi yaxshi bo‘ladi.
Ammo muxbir bilan suhbatlashgan sotuvchilardan ayrimlari bu yilgi savdo avvalgi yillarga nisbatan kamayganini aytishdi. Bunga mamlakatda davom etayotgan iqtisodiy inqiroz, qashshoqlik va ishsizlikning kengayishi sabab bo‘lmoqda.
Do‘kondorlarning aytishicha, “quritilgan mevalar o‘tgan yillarga nisbatan arzonlashgan bo‘lsa-da, uni sotib olishga odamlarning qurbi yetmayapti”.
Hozir Mozori Sharif bozorida bir kilogramm bodom 5 dollardan 11 dollargacha, afg‘on pistasining kilogrammi 7 dollar, Eron pistasi esa 11 dollardan sotilmoqda.
Xuddi shunday, bir kilogramm mayiz 3 dollardan 4 dollargacha, mahalliy no‘xotning kilosi 2 dollardan, Eron no‘xotining kilosi 4 dollardan sotilmoqda.
O‘zbek kunjutli pechenyesining kilosi 2,5 dollar turibdi. Sotuvchilardan biri mahsulotlarining ko‘p qismini O‘zbekistondan olib kelishini aytdi.
Mozori Sharifdagi quruq meva sotuvchilardan yana biri, ro‘zg‘or tebratish uchun maktabni tashlagan Ali Sino “Daryo” muxbiriga shunday dedi: “Quruq mevalarning narxi o‘tgan yillarga nisbatan arzon, lekin odamlar mevaning narxini so‘raydi, xolos, sotib olishmaydi. Xavfsizlik yaxshilansa, afg‘onistonliklarning ko‘pchiligi vataniga qaytib, mehnat bozori ham gullab-yashnashi mumkin”.
Ayrim sotuvchilar esa shahar xavfsizligidan, quruq meva va shirinliklar sotuvidan mamnun ekanini bildirgan.
Avvalroq “Daryo” jamoasi Markaziy Osiyo va Afg‘onistondagi asosiy mahsulotlar, ya’ni guruch, piyoz, kartoshka, sabzi va pomidor narxini solishtirgan edi.
Izoh (0)