“O‘zbekiston milliy elektr tarmoqlari” yil boshidan beri 846 mlrd so‘m zarar ko‘rdi

“O‘zbekiston milliy elektr tarmoqlari” kompaniyasi 2023-yilning birinchi choragida 846 mlrd so‘m zarar ko‘rdi. Bu haqda kompaniya moliyaviy hisobotidan ma’lum bo‘ldi. 

Kompaniya uch oyda 7,3 trln so‘m daromad olgan. Shunga qaramay, 8 trln so‘mlik xarajat ham qilingan. 

“O‘zbekiston milliy elektr tarmoqlari”ning daromadi birinchi chorakda 2022-yilning mos davriga nisbatan 2,2 trln so‘mga ko‘paygan va xarajatlar ham bir vaqtning o‘zida 1,5 trln so‘mga oshgan. 

Kompaniya joriy yilning ilk choragida 846 mlrd so‘m zarar ko‘rgan bo‘lsa ham, 2022-yilning dastlabki choragiga nisbatan uning zarari 645 mlrd so‘mga kamroq bo‘lgan. 

“O‘zbekiston milliy elektr tarmoqlari” matbuot xizmati holat bo‘yicha “Daryo”ga izoh berdi

“Bunga sabab, Aksiyadorlik jamiyatining moliyaviy faoliyati bo‘yicha asosiy daromadi — elektr energiyasini yagona xaridi va sotishidan shakllanadi. Ya’ni, hisobot bo‘yicha asosiy zararni mahsulot (tovar, ish va xizmat) larni sotishning yalpi zarari 707,4 miliard so‘mni tashkil etgan. Bunda ushbu tariflar Vazirlar Mahkamasi huzuridagi Idoralararo ta’rif komissiyasi tomonidan belgilanib, 2023-yil 1-choragida elektr energiyasini ishlab chiqaruvchi korxonalardan jami 18,6 mlrd. kVt soat elektr energiyasi o‘rtacha QQS bilan 426,2 so‘mdan xarid qilinib, Hududiy elektr tarmoq korxonalariga 18,8 mlrd.kVt soat hajmda o‘rtacha 405,4 so‘mdan sotilgan, ya’ni har bir kVt soatdan 20,8 so‘mdan zarar ko‘rilgan”

“O‘zbekiston milliy elektr tarmoqlari” qanday kompaniya? 

“O‘zbekiston milliy elektr tarmoqlari” aksiyadorlik jamiyati prezidentning 2019-yil mart oyidagi qaroriga muvofiq tashkil etilgan. Kompaniya Energetika vazirligi tizimida faoliyat yuritadi.

Asosiy faoliyat turlari quyidagilar:

• O‘zbekistonning magistral elektr tarmoqlaridan foydalanish va ularni rivojlantirish;
• elektr energiyani magistral elektr tarmoqlari orqali yetkazib berish;
• davlatlararo tranzitni amalga oshirish;
• qo‘shni davlatlarning elektr energetika tizimi bilan hamkorlik qilish va boshqalar.

“O‘zbekiston milliy elektr tarmoqlari” markaziy apparati va tarkibidagi tuzilma hamda filiallarda jami bo‘lib, 4300 nafardan oshiq xodim ishlaydi.