2023-yil boshidan buyon Rossiyaning eng badavlat tadbirkorlarining umumiy boyligi 16,35 milliard dollarga oshdi. Bu haqda “Daryo”ga Bloomberg milliarderlar indeksidan ma’lum bo‘ldi.
Ma’lumotlarga ko‘ra, “NK Lukoil” hammuallifi Vagit Alekperovning boyligi eng ko‘p — 3,7 milliard dollardan oshib, 19,1 milliard dollarga yetdi.
Indeks tadbirkorlar ulushi bo‘lgan kompaniyalar aksiyalari qiymatidan kelib chiqqan holda hisoblanadi.
Umuman olganda, Bloomberg reytingiga dunyoning 500 ta eng boy odami kiritilgan. Hozir uning tarkibiga 22 nafar rossiyalik kiradi. Ularning umumiy boyligi 1-may holatiga ko‘ra, 279,88 milliard dollarni tashkil qiladi.
“Norilsk Nikel” kon-metallurgiya kompaniyasining asosiy egalaridan biri bo‘lgan Vladimir Potanin Rossiyaning eng boy tadbirkorlari orasida yetakchi bo‘lib qolmoqda. Joriy yil boshidan buyon uning boyligi 448 million dollarga oshib, 29 milliard dollarga yetdi.
Reytingning ikkinchi qatorini Rossiyaning eng yirik tabiiy gaz kompaniyasi “Novatek” hammuallifi Leonid Mixelson egallab turibdi, uning boyligi 3,09 milliard dollarga oshib, 27,7 milliard dollarga yetdi.
Uchinchi o‘rinda NLMK po‘lat kompaniyasining benefitsiari Vladimir Lisin. U boyligini 1,74 milliard dollarga oshirib, 21,6 milliard dollarga yetkazdi.
2023-yilning birinchi oylarida Vagit Alekperov Bloomberg reytingida oltinchi o‘rindan to‘rtinchi o‘ringa ko‘tarildi. Uning boyligi 19,1 milliard dollarga yetib, 3,73 milliard dollarga oshgan.
USM Holding asoschisi Alisher Usmonov beshinchi o‘ringa tushib ketdi. Uning boyligi hozirda 18,7 milliard dollarga (+217 million dollar) baholanmoqda.
Reytingning oltinchi qatorida “Severstal”ning asosiy benefitsiari Aleksey Mordashov turibdi, uning boyligi 439 million dollarga kamayib, 18,3 milliard dollar qoldi.
Onexim investitsiya fondi asoschisi Mixail Proxorov reytingdagi o‘z o‘rnini saqlab qoldi, u yettinchi o‘rinda. Uning boyligi 1 milliard dollarga oshib, 14,2 milliard dollarga yetdi.
“Novatek” va “Sibur”ning hammuallifi, boyligi 13,7 milliard dollarga (+1,86 milliard dollar) baholangan Gennadiy Timchenko to‘qqizinchi o‘rindan sakkizinchi o‘ringa ko‘tarildi.
Rossiyaning eng badavlat tadbirkorlari o‘ntaligiga Alfa Group asoschisi Mixail Fridman hamda EuroChem va Suyek kompaniyalarining sobiq benefitsiari Andrey Melnichenko kirdi.
Yil boshidan buyon Fridmanning boyligi 719 million dollarga oshgan, janob Melnichenkoning boyligi esa 1,17 milliard dollarga kamaygan. Ikkalasining boyligi 12 milliard dollarga baholangan.
Avvalroq dunyodagi eng badavlat odamning boyligi bir kunda 12 milliard dollarga oshgani haqida xabar berilgandi.
Izoh (0)