Dunyoning 180 mamlakati orasida Afg‘oniston sekin internet tezligi bo‘yicha ikkinchi o‘rinni egallagan.
Afg‘oniston fuqarolariga “Afg‘on Wireless”, “Roshan”, “MTN” va “Etsalat” nomli 4 ta xususiy, “Salom” va “Vasl” nomli 2 ta davlat tarmoqlari xizmat ko‘rsatadi. Respublikaning shimoliy viloyatlarida odamlar internet xizmati holatidan shikoyat qilmoqda. Jumladan, internet-paketlarining yuqori narxiga nisbatan uning tezligi juda past.
Balx viloyati jurnalistlaridan birining “Daryo” muxbiriga aytishicha, u internet xizmatlari sifati pastligi tufayli o‘z media ishini bajarishda muammolarga duch kelgan. U har oy ikki mingga yaqin afg‘oni, ya’ni 22 dollar sarflaydi. Ammo internet tezligi shunchalik pastki, u yangiliklarini o‘z vaqtida nashr eta olmaydi.
Quyida Afg‘oniston telekommunikatsiya tarmoqlaridan birining internet narxi namuna sifatida berilgan:
- 1 GB — 1,25 dollar;
- 2 GB — 2,50 dollar;
- 3 GB — 3,80 dollar;
- 4 GB — 5 dollar;
- 5 Gb — 6,30 dollar.
Balx viloyatida yashovchi Ahmad Munir ham internet sustligidan shikoyat qilgan. U
“Tolibon” hukumatidan telekommunikatsiya tarmoqlari odamlarning pullarini turli yo‘llar bilan o‘g‘irlayotganiga e’tibor qaratishni so‘ragan.
“Biroq internet sifati va tezligi haqida hech qanday yangilik yo‘q”, — deydi u va har oyda SIM kartasini almashtirishdan charchaganini aytgan.
Internet pastligi afg‘on xalqi uchun, ayniqsa, “Tolibon” tomonidan qizlar ta’limi taqiqlanganidan keyin onlayn yoki masofaviy ta’limga o‘tgan bir qator afg‘on qizlari uchun katta muammoga aylandi.
Afg‘onistonning shimoliy viloyatlari aholisi “Tolibon” hukumatining Aloqa va axborot texnologiyalari vazirligi rasmiylari Afg‘oniston shimolidagi internet xizmatlari holatiga jiddiy e’tibor qaratishi kerakligini ta’kidlamoqda.
Ma’lumotlarga ko‘ra, Afg‘onistonda internet narxi O‘zbekiston, Tojikiston, Eron va Pokiston kabi qo‘shni davlatlarga nisbatan juda qimmat bo‘lsa-da, tezligi unchalik yuqori emas.
Shu sababli telekommunikatsiya tarmoqlari mijozlari ba’zan internet tezligining sustligi tufayli SIM kartalarini bir tarmoqdan boshqa tarmoqqa o‘zgartiradi, ammo natija nolga teng.
Afg‘onistondagi internet xizmatlari sifati doimo tanqid ostiga olingan. Ma’lumotlarga ko‘ra, Afg‘onistondagi internet dunyoning 137 davlati orasida eng past tezlikka ega.
Izoh (0)