Samarqanddan Ufaga uchgan samolyot texnik sabablarga ko‘ra ortga qaytdi

“Azimut” aviakompaniyasining Samarqand—Ufa yo‘nalishi bo‘ylab uchgan samolyoti texnik sabablarga ko‘ra “Samarqand” xalqaro aeroportiga qaytdi. Bu haqda Uzbekistan Airports matbuot xizmati xabar berdi. 

Qayd etilishicha, Toshkent vaqti bilan soat 12:00 da bortida 87 yo‘lovchi bo‘lgan AZO7040 reysi uchish aeroportiga kelib qo‘ngan.

“Ayni damda yo‘lovchilar Samarqand aeroporti terminaliga joylashtirildi”, — deyiladi xabarda.

Eslatib o‘tamiz, 2022-yil oktabrda Rossiya “Azimut” aviakompaniyasining Moskvadan Urganchga uchayotgan samolyoti Samaraga favqulodda qo‘ngandi. Bunga yo‘lovchilardan birining sog‘lig‘i yomonlashgani sabab bo‘lgan. 18-yanvar kuni esa “Aeroflot” kompaniyasi samolyoti ​​Moskvadan Goaga uchayotgan vaqtida Urganchga qo‘ndirilgan edi.