Qozog‘istonda sodir bo‘lgan YTHda ikki nafar o‘zbekistonlik vafot etdi

Qozog‘istonning Aqto‘be viloyatida 16-may kuni sodir bo‘lgan yo‘l transporti hodisasi oqibatida ikki nafar o‘zbekistonlik vafot etdi. Bu haqda Qozog‘iston Ichki ishlar vazirligi Telegram kanalida xabar berildi.

Samara—Chimkent avtomobil yo‘lida Toyota RAV-4 va Chevrolet Lacetti avtomobillari to‘qnashib ketgan. O‘zbekiston fuqarolari bo‘lgan Chevrolet haydovchisi va yo‘lovchisi voqea joyida vafot etgan. Shuningdek, Chevrolet’ning uch nafar yo‘lovchisi hamda Toyota avtomobilida bo‘lganlar tibbiyot muassasasiga yotqizilgan.

YTH yuzasidan tergov ishlari olib borilmoqda.

15-may kuni Moskva va Sankt-Peterburg oralig‘idagi M-11 trassasida O‘zbekiston fuqarolari ishtirokida yo‘l-transport hodisasi (YTH) sodir bo‘lgan edi. Bir nechta avtomobil ishtirokidagi avariyada to‘rt nafar O‘zbekiston fuqarosi jabrlangan. Ulardan ikki nafarining ahvoli og‘ir.