Tramp AQSHning yadro arsenaliga oid maxfiy hujjatlarni hojatxonada saqlaganlikda ayblandi (foto)
Federal prokurorlar AQSH sobiq prezidenti Donald Trampga maxfiy hujjatlar bilan ishlash qoidalarini buzganlik ishi bo‘yicha ayblov xulosasini eʼlon qildi.
49 sahifalik xulosada Trampga 37 ta band bo‘yicha ayblov eʼlon qilingan. Unda aytilishicha, Tramp Oq uyni tark etayotgan vaqtda maxfiy hujjatlar solingan o‘nlab qutilarni o‘zi bilan olib ketgan va ularni Palm-Bichdagi (Florida shtati) Mar-a-Lago qarorgohida saqlagan.
Tramp maxfiy hujjatlar solingan qutilarini uyining turli joylarda, jumladan, bal o‘tkaziladigan zal, yuvinish xonasi va dush, hojatxona, yordamchisining xonasi, yotoqxona va oshxonada saqlagan. AQSH Adliya vazirligi tomonidan e’lon qilingan fotosuratlardan birida hojatxonaga maxfiy hujjatlar qutilari terib qo‘yilganini ko‘rish mumkin.
Ushbu hujjatlar orasida AQSH va boshqa mamlakatlarning mudofaa qobiliyati, yadro qurollari holati haqidagi hisobotlar, razvedka brifinglari, tahliliy materiallar va boshqa hujjatlar bor.
Ayblovlar milliy mudofaa bo‘yicha maxfiy hujjatlarni qasddan noto‘g‘ri saqlash bo‘yicha 31 ta holat, jumladan, adolatga to‘sqinlik qilish uchun fitna uyushtirish, hujjatlarni korrupsiya maqsadida yashirish, federal tergov paytida yashirish, yolg‘on bayonotlar berish kabilarni o‘z ichiga oladi.
Trampning yordamchisi Uolt Nauta ham maxfiy hujjatlarga oid oltita jinoiy ish bo‘yicha ayblangan.
Josuslik to‘g‘risidagi qonunga ko‘ra, Trampga maksimal 20 yillik qamoq jazosi berilishi mumkin, deya aniqlik kiritdi CNBC.
