Politico: 11 ta davlat ukrainalik uchuvchilarni F-16 qiruvchilarini boshqarishga o‘qitishga tayyor, ammo AQSH bunga haligacha ruxsat bermagan

Daniya va Niderlandiya boshchiligidagi 11 ta davlatdan iborat koalitsiya ukrainalik uchuvchilarni Amerikaning F-16 qiruvchi samolyotlarini boshqarishga o‘qitishni boshlashga tayyorligini rasman ma’lum qildi. Ammo ular Vashington rasmiy ruxsat bermaguncha ishga kirisholmaydi, deb yozdi Politico.

Nashrning yozishicha, koalitsiya mashg‘ulotlarni avgust oyida boshlashni kutmoqda, o‘shanda Ruminiyadagi o‘quv markazi o‘z ishini boshlashi kerak. Biroq mashg‘ulotlarning aniq boshlanish sanasi AQSH Davlat departamenti tomonidan belgilanadi, u koalitsiyaning ekspluatatsion qo‘llanmalar, parvoz simulyatorlari va samolyotlarga tegishli boshqa materiallarni topshirish bo‘yicha so‘rovini rasman imzolashi kerak.

Bu qachon bo‘lishi noma’lum. Pentagon vakili Garron Garnning so‘zlariga ko‘ra, so‘rov “hali ko‘rib chiqilmoqda”.

O‘z navbatida, Politico prezident Jo Bayden dasturni ma’qullashga va’da berganini, biroq ilg‘or harbiy texnologiyalar transferini ma’qullash uchun vaqt kerakligini eslatdi.

May oyida Buyuk Britaniya va Niderlandiya Ukraina havo mudofaasini kuchaytirish va ukrainalik uchuvchilarni G‘arb samolyotlarida o‘qitish bo‘yicha koalitsiya tuzishni taklif qilgandi. Keyinchalik AQSH Yevropa davlatlari tomonidan Kiyevga qiruvchilar berilishiga qarshi emasligi ma’lum bo‘ldi. Biroq bu haqda rasman e’lon qilinmagan.